پٹنہ :16/دسمبر (ایس او نیوز/آئی این ایس انڈیا) بہار اسمبلی میں اپوزیشن لیڈر اور آر جے ڈی لیڈر تیجسوی یادو نے بھارتیہ جنتا پارٹی اور پی ایم مودی پر حملہ کرنے کا موقع ہاتھ سے نہیں جانے دیا ۔ 2019 لوک سبھا انتخابات کے پیش نظر ابھی سے ہی بیان بازی کا دور شروع ہے ۔اور ہر لیڈر اپنے مخالفین پر حملے کر رہا ہے۔ بہار کے سابق نائب وزیر اعلی تیجسوی یادو نے کہا کہ 2019 میں اگر مودی جیتتے ہیں تو رام کی جگہ مودی کے مندر بنے گا ۔ تیجسوی یادو نے ایک ٹوئٹ کرکے پی ایم مودی اور بی جے پی کو نشانے پر لیا اور آئین کو ختم کرنے کا الزام لگایا۔ تیجسوی یادو نے ٹوئٹ کیا کہ بی جے پی کا ایک ہی مقصد ہے۔جاگیردارانہ نظام کے تحت حکمرانی کرنا، سب کو غلام بنا کر رکھ، مخالفین کو ہراساں کیا جانا ان کے سرشت میں ہے ۔ آر ایس ایس کے منوادی ایجنڈا کو نافذ کرنا ۔ 2019 میں غلطی سے بھی بی جے پی کی حکومت بنتی ہے تو یہ لوگ بابا صاحب کے آئین کو ختم کر دیں گے۔ رام کی جگہ مودی کا مندر بنائیں گے۔واضح ہوکہ تیجسوی یادو نے اس سے پہلے وزیر اعلی نتیش کمار اور یوگی کے ملاقات کو لے کرتنقید کی تھی ۔ بہار دورے پر گئے یوگی آدتیہ ناتھ کی وزیر اعلی نتیش کمار سے ملاقات کو لے کر تیجسوی یادو نے جمعرات کو ٹوئٹ کرکے کہا کہ نتیش جی لاکھ کوشش کر لیں، ہم اتر پردیش کے وزیر اعلی کو بہار میں زہر نہیں اگلنے دیں گے اور نہ ہی فرقہ وارانہ ہم آہنگی خراب ہونے دیں گے ۔ بہارمخدوم شریف، گرو گووند سنگھ، سیتا، بد ھ اور مہاویر کی سرزمین ہے۔ یہاں نفرت ہرگز نہیں چلے گی ۔