اشرف کے بدلے میں شرتھ کا قتل ہوسکتا ہے تو دیپک راؤ کے بدلے میں بشیر کا قتل کیوں نہیں کیاجاسکتا؟۔ وی ایچ پی لیڈر جگدیش شینوا کا سوال
منگلورو 29؍جنوری (ایس او نیوز) وشوا ہندو پریشد کے ڈسٹرکٹ صدر جگدیش شینوا نے ایک متنازع بیان دیتے ہوئے علی الاعلان بے قصور عبدالبشیرکے قتل کا جواز فراہم کیا ہے۔
ایک کتاب کی رسم اجراء میں تقریر کرتے ہوئے جگدیش شینوا نے پوچھا کہ جب اشرف کے قتل کا بدلہ لینے کے لئے شرتھ مڈیوال کا قتل کیاجاسکتا ہے تو پھر دیپک راؤ کے قتل کے بدلے میں بشیر کا قتل کیوں نہیں کیا جاسکتا۔ جگدیش نے کہاکہ’’: ابھی حال ہی میں دیپک راؤ کے قتل کا بدلہ لینے کے لئے بشیر کا قتل کیا گیا۔ میڈیا نے رپورٹنگ کی کہ ایک بے قصور مسلمان کا قتل کیا گیا ہے۔لیکن بشیر کے قتل سے پہلے بے قصور دیپک راؤ کو قتل کیا گیا تھا۔میں وشواہندو پریشد کے ذمہ دار کے طور پر کہتا ہوں کہ ہمیں بشیر کے قتل کے تعلق سے کوئی فکر کرنے کی ضرورت نہیں ہے کیونکہ اسے دیپک راؤ قتل کاحساب چکانے کے لئے قتل کیا گیا تھا۔اگر اشرف قتل کا حساب چکانے کے لئے شرتھ مڈیوال کو قتل کیا جاسکتا ہے تو پھر دیپک راؤ کا بدلہ لینے کے لئے بشیر کو کیوں قتل نہیں کرنا چاہیے؟‘‘
جگدیش نے سینہ ٹھونک کرکہا میرے اس بیان کو اخبارات میں شائع ہونے دو۔ہم پر کیس داخل ہونے دو ہم اس کا سامنا کرنے کے لئے تیار ہیں۔ آج معاشرے میں برائیاں پھیل گئی ہیں۔ اس پر لگام لگانے کے لئے کچھ لوگ تیار ہوگئے ہیں۔ ان کو تحفظ فراہم کرنا ہمارے سماج کی ذمہ داری ہے ۔‘‘
