چھتیس گڑھ، 09نومبر(آئی این ایس انڈیا)  کانگریس صدر راہل گاندھی نے جمعہ کو چھتیس گڑھ کے کانکیر اور راج ناندگاؤں میں جلسہ عام سے خطاب کیا۔راہل گاندھی نے یہاں کہا کہ انہوں نے پہلی بار ایسا وزیر اعظم دیکھا جو انتخابات سے پہلے کہتے ہیں کہ 15لاکھ دیں گے، 2کروڑنوجوانوں کوروزگار دیں گے اور انتخابات ختم ہوتے ہی کہتے ہیں جھاڑو اٹھاؤ اور صفائی میں لگ جاؤ۔

راہل گاندھی نے کہاکہ انتخابات سے پہلے نریندر مودی بدعنوانی اور نوکری کی بات کرتے تھے لیکن اب کہتے ہیں کہ جھاڑواٹھاؤ، صفائی کرو۔وزیراعظم مودی اب نوٹ بندی پرنہیں بولتے ہیں۔راہل نے کہا کہ اگر وزیر اعظم نوٹ بندی پر بولیں گے تو لوگ انہیں اسٹیج سے بھگا دیں گے۔راہل نے یہاں ایک ریلی میں وزیر اعظم نریندر مودی پر حملہ کیا۔راہل گاندھی نے کہا کہ وزیر اعظم نریندر مودی نے اپنے کچھ تاجر دوستوں کا 3لاکھ کروڑ سے زیادہ کا قرض معاف کیا، لیکن کسانوں کے لئے کچھ نہیں کیا۔انہوں نے کہا کہ نیرو مودی،وجے مالیا، میہول چوکسی ملک کا پیسہ لے کر بھاگ گیا۔وجے مالیا ملک چھوڑنے سے پہلے وزیر خزانہ ارون جیٹلی سے ملا۔

راہل گاندھی نے یہاں ریلی سے خطاب کرتے ہوئے رافیل ڈیل کا مسئلہ اٹھایا۔راہل نے کہا کہ مودی حکومت نے HALسے معاہدہ چھین کر انل امبانی کی کمپنی کو دے دیا۔مودی حکومت نے 526کروڑ کا ہوائی جہاز 1600کروڑ روپے میں خریدا۔انل امبانی نے پوری زندگی میں ہوائی جہاز نہیں بنایا اور HALیہ کام 70سال سے کررہی ہے۔کانگریس صدر نے کہا کہ نریندر مودی نے نوٹ بندی کی، ملک کے لوگوں کو لائن میں کھڑا کر دیا۔اس سے صرف چوکیدا کے دوستوں کابھلاہوا تھا۔راہل گاندھی نے کہا کہ نو ٹ بندی کی گئی اور کالا دھن واپس لانے کے نام پر لوگوں کا بیوکوف بنایا گیا۔انہوں نے کہا کہ مودی حکومت نے لوگوں کو چونا لگانے والی کمپنیوں کے خلاف کوئی کارروائی نہیں کی۔