ویمنس ورلڈ کپ:ہندوستانی ٹیم کا آسٹریلیا سے مقابلہ، جیتی تو دوسری بار فائنل میں پہنچے گی
ڈربی،19؍جولائی (ایس او نیوز؍آئی این ایس انڈیا )اعتماد سے لبریز ہندوستانی ٹیم آئی سی سی خواتین ورلڈ کپ کے دوسرے سیمی فائنل میں جمعرات کو آسٹریلیا کے خلاف اترے گی تو اس کے ارادے 6 بار کی چمپئن کو شکست دے کر خطاب کی جانب اگلا قدم رکھنے کا ہو گا ۔ہندوستان کا آسٹریلیا کے خلاف خراب ریکارڈ رہا ہے اور 42میں سے 34میچوں میں اس کو شکست جھیلنی پڑی ہے۔متالی راج کی قیادت والی ٹیم حالانکہ کل اس شکست کا بدلہ لینے اترے گی، ہندوستان اگر کل جیت جاتاہے ،تو ٹورنامنٹ کی تاریخ میں دوسری بار فائنل میں پہنچ جائے گا۔ہندوستان 2005میں جنوبی افریقہ میں ہونے والے ٹورنامنٹ کے فائنل میں پہنچا تھا جس میں اس کو آسٹریلیا نے شکست دی تھی۔جنوبی افریقہ راؤنڈ رابن مرحلے میں پانچ جیت اور دو شکست کے ساتھ تیسرے اور آسٹریلیا سات میچوں 6 جیت کے ساتھ دوسرے نمبر پر رہا۔یہ میچ کاؤنٹی گراؤنڈ پر کھیلا جائے گا جہاں ہندوستان نے اپنے چار گروپ میچ کھیلے ہیں جس میں نیوزی لینڈ کے خلاف ’کرو یا مرو‘کا آخری میچ شامل تھا۔دوسری طرف آسٹریلیا نے اس میدان پر ایک بھی میچ نہیں کھیلا ہے، لیکن اس کی کارکردگی مسلسل اچھی رہی ہے۔ہندوستانی کپتان متالی نے کہاکہ مجھے لگتا ہے کہ یہ ہمارا گھریلو میدان ہے چونکہ ہم نے یہاں چار میچ کھیلے ہیں۔ہندوستان کو اس میچ کے ذریعے راؤنڈ رابن مرحلے میں آسٹریلیا سے ملی 8 وکٹ سے شکست کا بدلہ لینے کا بھی موقع ملے گا،حالانکہ ایسا کرنا آسان نہیں ہو گا۔آسٹریلیا کو شکست دینے کے لیے ہندوستان کو کھیل کے ہر شعبہ میں عمدہ کارکردگی کا مظاہرہ کرنا ہوگا۔آسٹریلیا کے خلاف راؤنڈ رابن مرحلے میں سست اننگ کھیلنے والیں متالی اپنی غلطی کو بہتر بنانا چاہیں گی، جبکہ پونم راوت اپنی سنچری کارکردگی کو دہرانے کے ارادے سے اتریں گی۔نیوزی لینڈ کے خلاف دباؤ والے میچ میں متالی نے سنچری بنائی ،جبکہ ویدا کرشنامورتی نے 40گیند میں 70رن جوڑا ۔اس کے بعد ہندوستانی گیند بازوں نے نیوزی لینڈ کو صرف 79رن پر سمیٹ کر 186رن سے جیت درج کی۔