انتخابات کے پیش نظر پارٹی لیڈروں کے باہمی تبادلہ خیالات کاسلسلہ سی ایم ابراہیم کی جے ڈی ایس سربراہ دیوے گوڈا سے ملاقات
بنگلورو،15؍ جنوری (ایس او نیوز) ریاستی اسمبلی انتخابات جیسے جیسے قریب آنے لگے ہیں ، سیاسی قائدین سے ملاقاتیں اور ان سے تبادلہ خیالات کا سلسلہ شروع ہوجاتا ہے جوکافی اہم اور دلچسپ ہوا کرتا ہے ۔انہی سیاسی گہماگہمی کے درمیان آج کانگریس کے سینئر قائد و رکن کونسل سی ایم ابراہیم نے جنتادل (سکیولر) کے قومی سربراہ و سابق وزیراعظم ایچ ڈی دیوے گوڈا اور جنتادل (سکیولر) کے ریاستی صدر و سابق وزیراعلیٰ ایچ ڈی کمارسوامی سے خصوصی ملاقات کرتے ہوئے کافی دیر تک ریاست کی سیاست پرتبادلہ خیال کیا۔ شنکرانتی تہوار کی مبارکباد پیش کرنے کے مقصد سے سی ایم ابراہیم نے پدمانابھ نگر میں مقیم ایچ ڈی دیوے گوڈا کی رہائش گاہ پہنچ کر تہوار کی مبارکباد پیش کی اور اگلے سیاسی اقدام کے تعلق سے دونوں سیاسی رہنماؤں کے ساتھ سی ایم ابراہیم نے کافی دیر تک تبادلہ خیال کیا۔ رکن کونسل و سینئر کانگریس قائد کی جنتادل (سکیولر ) رہنماؤں سے اچانک ملاقات سے سیاسی حلقوں میں ہلچل مچ گئی ہے ۔اگلے ریاستی اسمبلی انتخابات میں کسی بھی پارٹی کو اکثریت نہ ملنے پر حکومت قائم کرنے میں جنتادل (سکیولر) اہم رول ادا کرسکتا ہے ۔اس بات کو لے کر سی ایم ابراہیم جنتادل (سکیولر) رہنماؤں کے ساتھ تبادلہ خیال کئے جانے کی باتیں سامنے آئی ہیں۔اس سے قبل ایچ ڈی دیوے گوڈا کے بہت ہی قریبی مانے جانے والے سابق مرکزی وزیر سی ایم ابراہیم نے جنتادل کو خیر باد کہہ کر کانگریس پارٹی میں شمولیت اختیار کرلی تھی۔ لیکن کانگریس پارٹی کے سینئر قائد سی ایم ابراہیم کے مرتبہ کے مطابق مقام نہ ملنے پر وہ ناخوش ہیں ۔اس سے قبل بھی سی ایم ابراہیم نے کانگریس سے علاحدگی اختیار کرکے جنتادل (سکیولر ) میں شمولیت کااشارہ دیاتھا تاہم سدارامیا نے سی ایم ابراہیم سے ملاقات کرکے انہیں کانگریس نہ چھوڑنے کی گزارش کی تھی۔ جس کے بعد سی ایم ابراہیم نے اپنا فیصلہ بدلاتھا۔ اس کے بعد کانگریس نے سی ایم ابراہیم کو پلاننگ بورڈ کا ڈپٹی چیرمین بنایا اور اس کے بعد انہیں رکن کونسل بھی بنایاتھا۔ اگلے اسمبلی انتخابات میں کسی پارٹی کواکثریت حاصل نہ ہونے کی صورت میں جنتادل (سکیولر) اور کانگریس مخلوط حکومت بن سکتی ہے۔ اس تعلق سے دونوں لیڈروں نے تبادلہ خیال کیا ہے۔
سدارامیا کو کمارسوامی کا چیلنج:سابق وزیراعلیٰ وجے ڈی ایس کے ریاستی صدر ایچ ڈی کمارسوامی نے وزیراعلیٰ سدارامیا کو چیلنج کیا ہے کہ وہ کانگریس سے باہر نکل کر آزاد امیدوارکی حیثیت سے اسمبلی انتخاب جیت کر دکھائیں ۔اپنے والد سابق وزیراعظم ایچ ڈی دیوے گوڈا کی رہائش گاہ پر منعقدہ ایک سادہ تقریب کے بعد نامہ نگاروں سے بات کرتے ہوئے کمارسوامی نے یہ چیلنج کیا۔ انہوں نے کہاکہ سدارامیا آزاد امیدوار کی حیثیت سے چناؤ جیت کر دکھائیں تو انہیں ان کی طاقت کا اندازہ ہوگا۔یہ تقریب سابق وزیرآنند اسنوٹیکر کے بی جے پی سے جے ڈی ایس میں شمولیت اختیار کرنے پر منعقد تھی۔