بھٹکل 10/دسمبر (ایس او نیوز)انکم ٹیکس ڈپارٹمنٹ کی جانب سے غیر قانونی اور غیر محسوب کرنسی کے لین دین پر چھاپے مارنے اور بڑی مقدار میں نئی کرنسی ضبط کرنے کا سلسلہ دن بدن تیز ہوتا جارہا ہے۔
تاملناڈو کے ویلور سے ملنے والی اطلاع کے مطابق انکم ٹیکس ڈپارٹمنٹ نے ایک کار سے 24کروڑ روپے کے 2ہزار کے نئے کرنسی نوٹ ضبط کیے ہیں۔بتایا جاتا ہے کہ بنگلورو میں تین دن پہلے شیکھر ریڈی، سرینواسلو اور پریم نامی تاجروں کے یہاں چھاپہ مارتے ہوئے سو کروڑ سے زیادہ مالیت کے نئے اور پرانے نوٹوں کے علاوہ 36کروڑ سے زیادہ مالیت کا 127کلو سونا جوضبط کیا گیاتھا۔ اسی سلسلے کی کڑی کے طور پر تملناڈو میں مارے گئے چھاپے میں 24کروڑ روپے کی نئی کرنسی افسران کے ہاتھ لگی ہے۔ریڈی جس کی کار سے یہ رقم برآمد ہوئی ہے اس کے بارے میں کہا جاتا ہے کہ وہ ایک کنٹراکٹرہے اور تملناڈو میں کئی منصوبوں پر وہ کام انجام دے رہا ہے۔اس کے علاوہ وہ آندھرا میں تروملا تروپتی مندر کے بورڈ کا رکن بھی ہے۔خبر ملی ہے کہ چھاپہ ماری اور نقد رقم ضبط ہونے کے بعد آندھرا پردیش حکومت نے ریڈی کو مندر بورڈ سے ہٹا دیا ہے۔
دوسری طرف بنگلورو سے ملنے والی ایک اطلاع کے مطابق چترادرگہ کے چیلا کیرے نامی ایک چھوٹے سے گاؤں میں ایک حوالہ کاروباری کے گھر پر آئی ٹی ڈپارٹمنٹ کے چھاپے کے دوران اس کے باتھ روم میں موجود خفیہ خانے سے 5.70کروڑ کی نقد رقم بر آمد ہوئی ہے جس میں نئے اور پرانے کرنسی نوٹ شامل ہیں۔ اس کے علاوہ اس کے یہاں سے 28کلو سونے کے بسکٹس اور4کلو سونے کے زیورات بھی برآمد ہوئے ہیں۔
اسی طرح گوا سے ملنے والی ایک رپورٹ کے مطابق پورورم پولیس اسٹیشن کی حدود میں اسکوٹر پر دوہزار کے نئے کرنسی نوٹوں میں 70لاکھ روپے لے جاتے ہوئے رمیش نارویکر اور سدھو نامی دوافراد کو گرفتار کرلیا گیا ہے۔جبکہ گوا کے مختلف علاقوں میں چھاپہ ماری کے دوران 1.5کروڑ روپے کی نئی کرنسی ضبط کی گئی ہے۔انکم ٹیکس افسران کی طرف سے کرناٹکا اور گوا میں چھاپہ ماری کا سلسلہ ابھی جاری ہے۔