کولکاتا،2؍فروری (ایس او نیوز؍یو این آئی)  گزشتہ چند دنوں میں ترنمول کانگریس کے لیڈروں کو سی بی آئی کی طرف سے دیئے گئے نوٹس پر سخت رد عمل ظاہر کرتے ہوئے وزیرا علیٰ ممتا بنرجی نے کہا کہ ”وزیر اعظم مودی اپوزیشن جماعتوں کو ڈرانے و دھمکانے کے لئے اپنے افسروں کے ذریعہ اپوزیشن جماعتوں کو نوٹس بھیجوا رہے ہیں۔ مگر لوگ سب کچھ سمجھ رہے ہیں۔

مغربی بنگال کی وزیرا علیٰ نے کہا کہ اگر ان سب نوٹس کا مقصد مجھے گرفتار کرنا ہے تو مجھے کوئی حرج نہیں ہے۔ وزیرا علیٰ ممتا بنرجی نے کہا کہ میری ہندی بہت اچھی نہیں ہے، ممکن ہے کہ میرے کچھ الفاظ کے مفاہیم و معانی کچھ اور ہوگئے ہوں گے تاہم میں نے کبھی افسران کو مورد الزام نہیں ٹھہرایا، مجھے معلوم ہے کہ مودی افسران کو مجبور کررہے ہیں کہ اپوزیشن جماعتوں کو بدنام کرنے کے لئے کچھ کریں، کچھ کریں، افسران پریشان ہیں۔

وزیر اعظم مودی کی سخت تنقید کرتے ہوئے کہا کہ میں اس دن کا انتظار کر رہی ہوں جس دن میرے لیے کھانا پکانے والے کو بھی مرکزی ایجنسیاں نوٹس دیں گی۔ خیال رہے کہ دو دن قبل ہی وزیرا علیٰ کے ذاتی معاون مانک مجمدار کے گھر پر سی بی آئی نے چھاپہ مار کر پوچھ تاچھ کی ہے۔ شاردا چٹ فنڈ گھوٹالے میں سی بی آئی نے ان سے پوچھ تاچھ کی ہے۔

تاہم وزیرا علیٰ ممتا بنرجی نے مودی کو چیلنج دیتے ہوئے کہا کہ اگر ان میں جرأت ہے تو انہیں گرفتار کرکے دیکھائیں، وزیرا علیٰ ممتا بنرجی نے کہا کہ ان سے ذاتی مخاصمت نبھائی جارہی ہے مگر میں اس کے لئے تیار ہوں۔ وزیرا علیٰ نے کہا کہ میں سیاسی طور پر مقابلہ کرنے کو تیار ہوں، مگر یہ لوگ سیاسی مقابلہ کرنے کی ہمت نہیں رکھتے ہیں۔ وزیرا علیٰ نے کہا کہ جن لوگوں نے 30 سے 40 سالوں تک عوامی خدمات کی ہیں ان کے کردار کو ایجنسیوں کے ذریعہ داغدار نہیں کیا جاسکتا ہے۔