بھٹکل میں اسٹریٹ لائٹ کی بیٹریاں چوری کرنے والوں کی پولس کررہی ہے تلاش؛ سی سی ٹی وی کیمرہ میں چوری کی واردات ہوگئی قید
بھٹکل 15/ڈسمبر (ایس او نیوز)بھٹکل کے مختلف علاقوں میں گذشتہ کئی دنوں سے اسٹریٹ کے کھمبوں پر لگی سولار لائٹ کی بیٹریاں چوری ہونے کی وارداتیں پیش آرہی تھی، بینگرے اور شرالی علاقوں میں چوریوں کی زائد وارداتیں ریکارڈ کی گئی تھی جبکہ اُترکوپا ودیگر علاقوں میں بھی بیٹریاں چوری ہونے کی شکایتیں ملی تھی، اس تعلق سے مرڈیشور پولس تھانہ میں چوری کی شکایتیں درج کی گئی تھیں، اس دوران ایک مندر کے باہر لگے کھمبے سے سولار لائٹ کی بیٹری چوری کرنے کی پوری واردات مندر کے کیمرہ میں ریکارڈ ہوگئی ہے اور پوری وڈیو سوشیل میڈیا پر وائرل ہونے کے بعد پولس کچھ زیادہ متحرک ہوگئی ہے اور چوروں کی تلاش میں جٹ گئی ہے۔
سی سی ٹی وی فوٹیج میں دیکھا گیا ہے کہ دو چور ایک اسکوٹر پر آتے ہیں اور کھمبے پر لگی ہوئی بیٹری کو نکال دیتے ہیں۔ پولس نے بتایا کہ فوٹیج پر چہرے صاف نہیں ہیں، البتہ اسکوٹر کا نمبر پلیٹ اور دیگر معلومات کی بنیاد پر چھان بین جاری ہے۔