ہبلی 19؍اگست (ایس او نیوز) ہبلی دھارواڑ پولیس کمشنریٹ کی جانب سے کاروار روڈ پر واقع سی آ ر گراؤنڈ میں پیس میٹنگ کا اجلاس منعقد کیاگیا جس میں موروساویرا مٹھ کے سوامی گرو سدا راج،میئر ڈی کے چوہان، میونسپال کمشنر سدا لنگیا ہیرے مٹھ وغیرہ حاضر تھے۔

اس موقع پر خطاب کرتے ہوئے ہبلی دھارواڑ پولیس کمشنر این ناگراج نے کہا کہ تہواروں کو مناتے ہوئے اس بات کا خیال رکھا جائے کہ اس سے کسی کے بھی جذبات کو ٹھیس نہ پہنچنے پائے اور امن و شانتی میں کسی قسم کا خلل پیدا نہ ہو۔اس کے علاوہ گنیش کی مورتیاں بٹھانے کے لئے میونسپالٹی اور گرام پنچایت کی طرف سے لازمی طور پر اجازت حاصل کی جانی چاہیے۔ گانے بجانے کی آواز سے عوام کو تکلیف نہ ہو اس کادھیان رکھنا ہوگا۔رات کے وقت مائک کا استعمال نہ کیا جائے۔ مورتی ڈبونے کے لئے جانے والے راستے سے متعلق پولیس کو پہلے سے مطلع کرنا ہوگا۔اور اس دوران شراب نوشی اور رنگوں کا استعمال کرنے سے گریز کیا جائے۔ پولیس کمشنرنے وارننگ دیتے ہوئے کہا کہ تہوار کے پس منظر میں قانون کی خلاف ورزیاں کرنے والوں کے خلاف سخت کارروائی کی جائے گی۔پروگرام میں مسلمان، ہندو اور عیسائی طبقات کے نمائندوں نے شرکت کی۔