قحط سالی پیش نظر ہبلی میں ہوائی جہاز سے بادل برسانے کی مہم
ہبلی 19؍اگست (ایس او نیوز) ہبلی سے موصولہ ایک رپوٹ کے مطابق بارش کی قلت کی وجہ سے زراعتی سرگرمیوں کو ہونے والے نقصان کے پیش نظر مصنوعی طریقے سے بادلوں کو برسانے کی مہم ہبلی ایئر پورٹ سے چلائی جائے گی۔
ہبلی ایئر اتھاریٹی کے ڈائریکٹر شیوانند بینال کے مطابق اگلے کچھ ہی دنوں میں تین ہوائی جہازوں کے ذریعے ہبلی ایئر پورٹ سے 16دنوں تک بادل برسانے کی مہم چلائی جائے گی۔ دراصل اس مہم کو 18اگست سے شروع کیا جاناتھا ، مگر ابھی سرکاری حکم باضابطہ طور پر ایئر پورٹ اتھاریٹی کو موصول نہیں ہوا ہے اس لئے اس میں دو ایک دن کی مزید تاخیر ہوسکتی ہے۔
خیال رہے کہ ریاستی حکومت نے بیرونی ممالک سے بادل برسانے والی مشینوں سے لیس خصوصی ہوائی جہاز منگوائے ہیں جو فی الحا ل بنگلورو ایئر پورٹ پر موجود ہیں۔کل تین ہوائی جہازوں میں سے دو کو بادل برسانے کے لئے عملی طور پر استعمال کیاجائے گا اور ایک ہوائی جہاز اضافی ضرورت کے لئے ریزرو رکھا جائے گا۔
اس سے قبل سال2008میں ایچ کے پاٹل کے زمانے میں گدگ، ہاویری اور دھارواڑ ضلع میں اگریگلچرل سائنس سنٹر کے تعاون سے پانی کی قلت دور کرنے کے لئے اس طرح مصنوعی طور پر بادل برسانے کی مہم چلائی گئی تھی۔اب کی بار قحط سالی کو دیکھتے ہوئے حکومت کے محکمہ دیہی ترقیات اور پنچایت راج کی طرف سے یہ مہم انجام دی جائے گی۔