ہبلی :نوٹ بندی کا فیصلہ غیر آئینی اور عوام دشمن فیصلہ : کانگریس پارٹی کا’’یوم سیاہ ‘‘کے طورپر سخت احتجاج
ہبلی:8/ نومبر (ایس اؤنیوز) مرکزی حکومت کے نوٹ بندی فیصلے کوغیر آئینی اور عوام دشمن قرار دیتے ہوئے ایک برس سے جھیل رہے عوامی تکالیف، دشواری اور پریشانیوں کے خلاف سخت اعتراض اور برہمی کا اظہار کرتے ہوئے دھارواڑ مہا نگر کانگریس کمیٹی کے زیر اہتما م سیاہ پٹی باندھ کر ’’یوم سیاہ ‘‘ منایا گیا ۔
ڈاکٹر امبیڈکر مجسمہ سے کتور چنما سرکل تک کانگریس لیڈران اور کارکنان نے سیاہ پٹی باندھے ریلی نکالی اور مرکزی حکومت کے غیر دستوری اقدام کے خلاف بے اطمینانی کااظہار کرتے ہوئے نعرے لگائے۔اس موقع پر ذمہ داران نے کہاکہ حزب مخالف سمیت کسی سے بھی بات چیت کئے بغیر نوٹ بندی کا فیصلہ لیا گیا جس کے نتیجے میں غریب مزدور، متوسط طبقے کے لوگ روزمرہ کی ضروریات کو پوری کرنے کے لئے ابھی تک مشکلات جھیل رہے ہیں، یہ صرف سرمایہ داروں کو فائدہ پہنچانے کے لئے اٹھایاگیا قدم ہے اس سے ملک کا کوئی فائدہ نہیں ہورہاہے اس کے برخلاف معاشی حالات بد سے بدتر ہوتے جانے کا الزام لگایا۔ ا س کے بعد تحصیلدار دفتر پہنچ کر میمورنڈم سونپا۔
اس موقع پر ہبلی دھارواڑ مہا نگر نائب صدر الطاف ہلور، لیڈران ایچ وی ماڈلی، دیوکی یوگانند، سروجا ہوگار، محمد کولور ، بنگاریش ہیرے مٹھ، پالیکاممبران، کارکنان اور دیگر عوا م شریک تھے۔