صنعاء،22؍اکتوبر(ایس او نیوز؍آئی این ایس انڈیا )یمن کی دستوری حکومت کے وزیر اطلاعات و نشریات نے ایران نواز حوثی شرپسندوں کو کڑی تنقید کا نشانہ بنایا ہے۔ ان کا کہنا ہے کہ حوثی باغی ایرانی رجیم کی اندھی تقلید کررہے ہیں۔ یمنی وزیر اطلاعات معمر الاریانی نے ایک بیان حوثیوں کی طرف سے آن لائن اخبارات پر پابندیوں کو ایران کی اندھی تقلید قرار دیا۔انہوں نے کہا کہ حوثی باغیوں کی جانب سے صحافیوں کی گرفتاریوں، انہیں جیلوں میں بند کرنے، ان کا عدالتی تعاقب، تشدد جیسے جرائم تسلسل میں نام نہاد قوانین کے ذریعے صحافتی اداروں اور صحافتی آزادیوں پر قدغنیں لگانا ایک نیا جرم ہے جو اس جرائم کے تسلسل کی ایک نئی کڑی ہے۔ الریانی کا کہنا ہے کہ حوثی باغیوں نے ملک میں آزادی صحافت اور صحافیوں کی زندگی خطرات سے دوچار کررکھی ہے۔یمنی وزیر کا کہنا ہے کہ حوثی شدت پسند آزادی صحافت کا گلا گھونٹ پر اپنی کرپشن اور قوم کے خلاف وحشیانہ جرائم کی پردہ پوشی کررہے ہیں۔انہوں نے کہا کہ حوثی لیڈر اور ان کے ساتھ شکست خوردہ ہوچکے ہیں۔ ان کی شکست حوثی لیڈر اور مں حرف سابق صدر علی صالح کے درمیان پائے جانے والے اختلافات سے عیاں ہوتی ہے۔ باغیوں کی نسل پرستانہ اور تباہی پھیلانے پالیسیوں سے عوام سخت نالاں ہیں۔ انہوں نے ملک کی سلامتی، عوام اور ملک کے مفادات داؤ پر لگا دیے ہیں۔واضح رہے کہ حوثیوں کے غیرآئینی حکومت کے وزیر اطلاعات نے ایک نیا آرڈر جاری کیا ہے جس میں آن لائن اخبارات پر نئی قدغنیں عاید کی گئی ہیں۔ باغی حکومت کے مطابق اس کی منظوری طے کردہ شرائط سے ہٹ کر آن لائن نیوز ویب سائیٹ چلانا قابل سزا جرم تصور کیا جائے گا۔