بھٹکل 20/مئی (ایس او نیوز) یہاں تعلقہ کے رگھوناتھ روڈ پر پشپانجلی تھیٹر کے قریب واقع ایک مکان میں آج صبح اچانک آگ لگ جانے سے گھر پورا جل کر خاکستر ہوگیا، البتہ گھر کے اندر موجود ایک دماغی طور پر معذور شخص کو پاس پڑوس کے لوگوں نے بچالیا۔

اطلاع کے مطابق آر ٹی او ایجنٹ کے طور پر کام کرنے والا دیانند پربھو ہمیشہ کی طرح اپنے بھائی شنکر پربھو  کو جو دماغی طور پر معذور ہے، مکان کے اندر  ہی چھوڑ کر اپنے کام سے باہر گیا تھا، صبح قریب دس بجے اچانک گھر سے آگ کے شعلے بلند ہوئے  تو پاس پڑوس کے لوگوں نے فوری طور پر فائر بریگیڈ کو خبر کی۔  بتایا گیا ہے کہ اس موقع پر گھر کے اندر موجود  شنکر واقعے سے بے خبر باتھ روم میں  نہانے میں مشغول تھا۔ مقامی لوگ  گھر کے اندر گھس کر اُسے باہر کھینچ لانے اور اُس کی جان  بچانے میں کامیاب ہوئے۔

آگ لگنے سے گھر کی چھت سمیت گھر کے اندر موجود الیکٹرک کے تمام آلات، پلنگ، الماریاں ، اُس میں موجود کپڑے ، کاغذات اور دستاویزات  سمیت  گھر کے دیگر فرنیچر وغیرہ  بھی جل کر خاکستر ہوگئے۔

فائر بریگیڈ کے عملے نے بعد میں آگ پر قا بو پالیا اور آگ کو مزید دوسری طرف پھیلنے سے روک دیا۔

سمجھا جارہا ہے کہ آگ شارٹ سرکیوٹ سے لگی ہوگی۔ واقعے کی اطلاع ملتے ہی ٹائون پولس تھانہ ، محکمہ الیکٹری سٹی  اور محکمہ روینو کے اہلکار موقع پر پہنچے اور جائزہ لیا۔