مینگلور یناپویا اسپتال کے قریب پارک کی گئی 8کاروں کو شرپسندوں نے پہنچایا نقصان؛ اسپتال کے باہر آوٹ پوسٹ قائم کرنے پولس سے مطالبہ
منگلورو 18؍اگست (ایس او نیوز) ڈیرلکٹّا میں شرپسندوں کے ذریعے یناپویا اسپتال کے قریب کرایے کے احاطے میں پارک کی گئی 8کاروں کو گذشتہ روز نقصا ن پہنچانے کی واردات پیش آنے کے بعد اسپتال انتظامیہ کی جانب سے پولس سے مطالبہ کیا گیا ہے کہ شرپسندوں کی طرف سے بار بار غنڈہ گردیوں کی وارداتوں کو دیکھتے ہوئے اسپتال کے قریب پولس آوٹ پوسٹ قائم کیا جائے۔
خیال رہے کہ یوم آزادی کے موقع پر آدھی رات کے وقت کاروں کو نقصان پہنچانے کی واردات پیش آئی تھیجس میں آٹھ کاروں کے شیشے توڑنے کے علاوہ کاروں کے دروازوں کو وغیرہ بھی نقصان پہنچایا گیا تھا۔اسپتال کا پارکنگ ایریا کم پڑنے کی وجہ سے اسپتال والوں نے قریب میں ایک احاطہ پارکنگ کے لئے کرایے پر لے رکھا ہے ۔ یہ کاریں اسی احاطے میں پارک کی گئی تھیں۔
پولیس کے پاس درج کی گئی شکایت کے مطابق یہ واردات آدھی رات کو 2اور3بجے کے درمیان پیش آئی ، جسے شرپسندوں کے ایک گروپ نے انجام دیا تھا ۔ اس حملے کے وقت غالب حسین نامی ایک شخص جوکہ اسپتال میں داخل ایک مریض کا رشتے دار تھااپنی کار میں موجود تھاوہ اس حملے میں زخمی ہوگیا تھا اور اسپتال میں داخل کیا گیا تھا۔ اس کے بیان کے مطابق حملہ آور منہ پر نقاب پہنے ہوئے تھے۔ جب تک اسپتال کا سیکیوریٹی اسٹاف مدد کو پہنچتا حملہ آور موقع سے فرار ہوگئے تھے۔ جن کاروں کو نقصان پہنچایاگیا تھا اس میں سے پانچ کاریں اسپتال میں داخل مریضوں کے رشتے داروں کی تھیں ۔اس کے علاوہ دو کاریں پی جی اسٹاف کی بتائی گئی تھیں۔
اسپتال کے ذمہ داران کا کہنا ہے کہ جن کاروں کو نقصان پہنچایا گیا ہے ان میں سے بہت سی کاریں دور دراز کے مریضوں کی تھیں اور وہ لوگ پولیس کیس کرکے قانونی بھاگ دوڑ میں الجھنا نہیں چاہتے تھے، انہیں علاج کے بعد اپنے گھر لوٹنے کی جلدی تھی۔البتہ اسپتال اسٹاف کی طرف سے اپنی کاروں کے نقصان پر شرپسندوں کے خلاف الال پولیس اسٹیشن میں شکایت درج کروائی جاچکی ہے۔