اُڈپی 8؍دسمبر (ایس او نیوز) ہوناور میں چل رہی فرقہ وارانہ کشیدگی کے پس منظر میں اُڈپی میں پریس کانفرنس سے خطاب کرتے ہوئے اڈپی۔منگلورو کی رکن پارلیمان شوبھا کرندلاجے نے الزام لگایا کہ وزیر اعلیٰ سدارامیا ہندوؤں کے قاتلوں اور جہادیوں کو تحفظ فراہم کررہے ہیں اور پولیس ہندوؤں اور ان کے مندروں کی حفاظت کرنے میں ناکام ہے۔

اُڈپی میں صبح پریس کانفرنس کا انعقاد کرنے کے بعد شام کو ہوناور پہنچ کر بھی اخباری کانفرنس کا انعقاد کیا جس میں ہوناور کے مسلمانوں کو جہادی مسلمان قرار دیتے ہوئے پولس پر الزام عائد کیا کہ پولس ان مسلمانوں کو تحفظ دے رہی ہے۔

شوبھا نے کہا کہ ان کی پارٹی کے لیڈر سورج نائک  نے  شخصی طور پر ایس پی سے شکایت کی تھی کہ ان کی کار کو نقصان پہنچایا گیا ہے۔ مگر پولس نے  اس تعلق سے کوئی کاروائی نہیں کی۔  دوسری طرف انہوں نے اس بات کا بھی الزام لگایا کہ ہوناور میں شنی ایشورا مندر کو جہادیوں نے نقصان پہنچایا۔ مندر میں جوتے اور چپل پھینکے۔مندر کی حفاظت کرنے پہنچے ہوئے ہندوؤں پر حملے کیے، مگر پولس خاموش رہی ۔شوبھا کے مطابق مسلمانوں نے پریش میستھا نامی بی جے پی کے کارکن کا اغوا کیا اور اُس کو قتل تک کیا۔ لیکن پولیس وزیر اعلیٰ کے دورے پر حفاظتی بندوبست میں مصروف رہی اور سب کچھ جانتے ہوئے بھی جہادیوں کے خلاف کوئی اقدام نہیں کیا۔

شوبھا کا کہنا تھا کہ عید میلاد کے بعد سے ہوناور میں فرقہ وارانہ کشیدگی کے واقعات میں اضافہ ہوا ہے۔ایسی حالت میں جبکہ ضلع (شمالی کینرا ) میں ہندوؤں کا قتل ہورہا ہو وہاں ہندوؤں کے تحفظ پر دھیان دینے کے بجائے وزیر اعلیٰ کاضلع کے دورے پر جانا اور وہاں 52ترقیاتی منصوبوں کا سنگ بنیاد رکھنا قابل مذمت ہے۔شوبھا کے مطابق  اس سے پہلے بھی بنٹوال میں شرتھ مڈیوال قتل کا معاملہ ہواتھا تب بھی سدارامیا نے منگلورو میں کانگریس ریالی میں شرکت کی تھی۔ شوبھا نے وزیراعلیٰ پر الزام لگایا کہ انہوں نے جہادیوں پر درج کیس بند کرنے اور ہندوکارکنوں کو گرفتار کرنے کے احکامات پولیس کو دے رکھے ہیں۔اس لئے ہندوؤں کے قاتلوں اور عوامی املاک و مندروں کو نقصان پہنچانے والوں کے خلاف کوئی اقدام نہیں کیا جارہا ہے۔