بھٹکل 20/ڈسمبر (ایس او نیوز) پڑوسی تعلقہ ہوناور میں مسلمانوں کو متحدرکھنے اور مسلمانوں کے مسائل کو حل کرنے کے مقصد کے تحت ہوناور تنظیم سوسائٹی کا قیام عمل میں لایا گیا ہے جس کا تعارفی اجلاس انشاء اللہ 13 جنوری بروز اتوار  کو رکھا گیا ہے۔ اس بات کی اطلاع   ہوناور تنظیم کے صدر محمد علی شیخ نے دی۔

بھٹکل میں ساحل آن لائن سے  گفتگو کرتے ہوئے انہوں نے بتایا کہ  فی الحال اس تنظیم کو ہوناور ٹاون تک محدود رکھا گیا ہے اورممبرشپ مہم جاری ہے، البتہ بعد میں قریبی قریوں سے  بھی ممبران کو  اس میں شامل کرنے کا ارادہ ہے۔

تعارفی اجلاس کے تعلق سے جناب محمد علی شیخ نے بتایا کہ  اجلاس اعلیٰ پیمانے پر منعقد کیا جارہا ہے اور تیاریاں جاری ہیں، اجلاس  میں  ضلع کی اہم شخصیات کو مدعو کیا جارہا ہے ۔ پروگرام ہوناور، پالیہ روڈ پر واقع  جیون جیوتی ہال،   میں 13 جنوری کو صبح ٹھیک دس بجے شروع ہوگا اور دوپہر ایک بجے اختتام کو پہنچے گا، اس موقع پر پروگرام میں شریک سبھی شرکاء کے لئے دوپہر کی ضیافت کا انتظام کیا گیا ہے۔ محمد علی صاحب نے  ہوناور سمیت  پاس پڑوس کے قریوں کے عوام سے بھی اجلاس میں کثیر تعداد میں شرکت کرنے کی درخواست کی ہے۔

محمد علی صاحب نے بتایا کہ 12 ایکزی کوٹیو  ممبران پر مشتمل  ہوناور تنظیم سوسائٹی  رجسٹرڈ کی گئی ہے اور ان میں سے  عہدیداران کا انتخاب کیا گیا ہے، جس کی تفصیل اس طرح ہے۔
صدر:                        محمد علی عبدالغفور شیخ
نائب صدر:                فیاض احمدیونس  شیخ
سکریٹری:                  محمد رفیق پٹھان
جوائنٹ سکریٹری :     شکیل مجید خان
خازن:                      محمد سلیم شیخ