ہوناور: بھٹکل کے قریب منکی نیشنل ہائی وے پرپرائیویٹ بس بے قابو ہوکر اُلٹ گئی؛ 16 شدید زخمی؛ چھ منی پال ایڈمٹ
بھٹکل 28/ ستمبر (ایس او نیوز) یہاں سے قریب 30 کلومیٹر دور منکی پولس تھانہ حدود کے گنونتی نیشنل ہائی وے پر ایک تیز رفتار پرائیویٹ بس بے قابو ہوکر اُلٹ جانے کے نتیجے میں بس پر سوار 16 مسافروں کو شدید چوٹیں آئی ہیں جس میں چھ کو نازک حالت میں منی پال اسپتال شفٹ کیا گیا ہے۔ ذرائع سے ملی اطلاع کے مطابق حادثہ اُس وقت پیش آیا جب ممبئی سے مینگلور جانے والی وی آر ایل بس کسی سواری کو تیزرفتاری کے ساتھ اوورٹیک کرنے کے نتیجے میں بے قابو ہوگئی اور سڑک کنارے اُلٹ گئی۔ بس پرجملہ 31 مسافرسوار تھے جس میں ڈرائیور سمیت دیگر 15 مسافروں کو معمولی چوٹیں آئی ہیں اور اُنہیں ہوناور اسپتال سے مرہم پٹی کے بعد ڈسچارج کیا گیا ہے۔ البتہ شدید چوٹیں آنے والوں کو کنداپور اسپتال اور منی پال اسپتال میں داخل کیا گیا ہے۔ منکی کے سماجی کارکن ذاکر کٹنگری نے بتایا کہ مسافروں میں ایک شخص کے دونوں ہاتھ کٹ گئے ہیں اسی طرح ایک خاتون کا بھی ہاتھ کٹ گیا ہے، انہوں نے بتایا کہ ایک ہاتھ کٹ ہوکر جائے حادثہ پر ہی گرا ہوا پایا گیا تھا۔
والوو بس پر مینگلور اور اُڈپی کے مسافر سوار تھے۔16 زخمیوں میں سات خواتین بھی شامل ہیں۔ حادثہ بدھ کی صبح قریب 5:15 بجے پیش آیا۔ ہوناور تعلقہ کے منکی مضافاتی پولس تھانہ میں معاملہ درج کیا گیا ہے۔