ہوناور 31؍جنوری (ایس او نیوز) رامنچندرپور مٹھ کے راگھویشور ا سوامی اور پریم لتا کے ’سیکس اسکینڈل‘سے متعلق چل رہے  تنازعے میں راگھویشورا سوامی کی طرف سے پریم لتا شاستری، اس کے شوہر دیواکر شاستری اور شوہر کے بھائی سی ایم این شاستری پر بلیک میلنگ کا کیس دائر کیاگیا تھا۔ اس کیس کی تحقیقات کرنے والی سی آئی ڈی کی ٹیم نے ناکافی ثبوت کی بات کہتے ہوئے عدالت میں’ بی رپورٹ‘ داخل کی تھی۔لیکن ہوناور جے ایم ایف سی عدالت نے اس رپورٹ کو مسترد کردیا۔

اس معاملے کی سماعت کررہے ہوناور جے ایم ایف سی عدالت کے جج پی بھاگوت نے سی آئی ڈی کی رپورٹ کو مسترد کرتے ہوئے اگلی سماعت یکم فروری کو جاری رکھنے کا فیصلہ کیا ۔راگھویشور اسوامی پر پریم لتا نے جو کہ رام کتھاگائیک کے طور پر مٹھ میں سوامی کے ساتھ رہا کرتی تھی، الزام لگایا تھا کہ سوامی نے اس کا جنسی استحصال کیا ہے۔ اس معاملے میں دوسر ا موڑ اس وقت آیا جب چندر شیکھر ہیگڈے نامی ایک شخص نے پریم لتا، اس کے شوہر اور اس کے دیور پر راگھویشوراسوامی کے خلاف بلیک میلنگ کی سازش رچنے اور 3کروڑ روپے کا مطالبہ کرنے کا کیس دائر کیا تھا۔جس کے بعد بنگلورو میں پریم لتا اور اس کے شوہر کو پولیس نے گرفتار بھی کرلیا تھا۔ مگر اس معاملے کی تحقیقات میں کافی ثبوت نہ ہونے کا سبب بتاکر سی آئی ڈی نے عدالت کو بی رپورٹ  سونپی تھی، جسے عدالت نے نامنظور کرتے ہوئے اگلی سماعت کے موقع پر شکایت کنندہ چندرشیکھر ہیگڈے کو اپنا بیان داخل کرنے کے لئے کہا ہے۔