ہوناور:26/فروری    (ایس او نیوز) یہ کوئی معمولی خیر خواہ نہیں ہیں! بقول خود ان کے وہ 150کروڑ روپئے جائیداد کے مالک ہیں، انہیں صرف 25ہزار روپئے ادا کرکے ممبربن جائیں گے تو واپس وہ تمہیں 25لاکھ روپیوں سے لے کر 1کروڑ روپیوں کا چک وہیں آپ کے سامنے آپ کو ادا کردیں گے۔ اچھنبے کی بات تو ہے  وہیں حیرت و استعجاب بھی ، تو چلئے ! دیکھیں ہوناور میں پیش آئے ایسے ایک  واقعہ کی حقیقت کیا ہے۔

دراصل ایسا  ایک واقعہ سنیچر کی شام ہوناور میں پیش آیا ہے ، شہر کے بندرگاہ روڈ کے دیپک الکٹرانکس کے مالک دیپک پربھو ان سے متاثر ہونے کے بعد شبہ میں مبتلا ہوکر پولس کو خبرکرتےہوئے عظیم خیر خواہ کو پولس کے حوالے کردیا ہے۔

نام نہاد خیر خواہ بڑے بڑے پروگرامات میں شرکت کرتے ہیں، وہاں  انعام یافتگان کو اپنی طرف سے انعام تقسیم کرنے کے بہانے منتظمین سےاپنائیت پیدا کرلیتے ہیں، کچھ نہ کچھ دے کر اپنی ایک تصویر ضرور کھینچ لینے کے بعد اپنا اصل کام شروع کرتے ہیں۔ انعام یافتہ کے خاندان کا اعتماد حاصل کرکے  انہیں بھروسہ دلاتےہیں کہ اگر وہ ان کے ادارے کے ممبر بنیں گے بڑی رقم کے ذریعے ان کی مدد کریں گے۔ ممبرشپ کی فیس صرف25ہزار روپئے۔ اتنا ادا کریں تو بس، 25لاکھ روپئے دینے کا یقین دلانےکی بات دیپک پربھو نے بتائی ہے۔ اپنے آپ کو ہاسن ضلع ارسیکیرہ تعلقہ باناور کامکین بتانے والا خیر خواہ کے پی وینکٹیش مورتی کا بیٹا شانبھوگ داسپا بتاتاہے۔ اور اپنے خاندان کی جائیداد میں سے 10کروڑ روپئے عوامی سطح پر غریبوں میں تقسیم کرنے کےلئے مختص کئے جانے کی تفصیلات پیش کرتاہے۔ دیپک پربھو کے ساتھ بھی اس بوڑھے نے ایسا ہی کیا۔ ہبلی کے ایک پروگرام میں دیپک کے بیٹے نے ایک پروگرام میں بہترین پرفارمنس کرنے کے بعد اس کو 2ہزار روپئے کا چاندی کالوٹا بطور انعام پیش کرکے ان سے رابطہ قائم کیا۔ دوسرے دن دیپک کے گھر ہوناور پہنچ کر اپنائیت میں اضافہ کیا اور کہاکہ کرایہ کے مکان میں ہو، کافی روپیہ پڑا ہواہے تم دونوں میاں بیوی کو 25-25لاکھ روپئے عطیہ دیتا ہوں، اچھا گھر بنا لو، دونوں بیٹوں کو اچھا پڑھاؤ، بس اس سے پہلے ایک کام کرو، تم دونوں میاں بیوی 25-25ہزارروپئے دے کر ممبر بن جاؤ، اس کے بعد جتنی چاہئے اتنی مدد لو۔ دیپک نے کہاکہ فی الوقت 10-15ہزاروپئے ہیں تھوڑے دنوں کے بعد پوری رقم ادا کرنےکی بات کہہ کر ٹال دیا۔ لیکن فروری میں دوبارہ فون کرکے دیپک سے کہاکہ مارچ تک کروڑوں روپیہ تقسیم کرنا ہے اس لئے جلدی اپنی ممبرشپ ادا کرو۔ فون پر اتنی بات کرنے کے  بعد سنیچر کو ہوناور میں دیپک کے گھر بوڑھا پہنچا تو دیپک شبہ میں مبتلا ہوگیا اور اس نے پولس کو اطلاع دی اور خیر خواہ کو پولس کے حوالے کردیا۔ جہاں پولس اس سے خیرخواہی کی داستان کی اسکرپٹ کی تیاری کے لئے پوچھ تاچھ کررہی ہے دیکھنا ہے کیا کلائمکس ہوتاہے۔