ہوناور میں مہلوک پریش میستا کے والد کے بیان پر کانگریس کے جگدیپ کا پلٹ وار؛ کہا کانگریس والے ڈاکٹر نہیں ہیں کہ وہ پریش میستا کی موت کو فطری موت کہیں
ہوناور:14/جولائی (ایس اؤ نیوز) پریش میستا کی مشتبہ ہلاکت کے سلسلے میں ہورہی سست رفتار تحقیقات کے خلاف ہوناور بلاک کانگریس کی جانب سے کی گئی بھوک ہڑتال کے ساتھ احتجاج کرنے پر مہلوک پریش کے والد کملاکر میستا نے بھوک ہڑتال کو فریبی چال اور دکھاوا قرار دیا تھا، ان کے الزام سے صریح انکار کرتے ہوئے ہوناور بلاک کانگریس جگدیپ تنگیری نے کہا ہے کہ ’’کانگریس والے ڈاکٹر نہیں ہیں کہ پریش میستا کی موت کو فطری موت کہیں ‘‘۔ دونوں طرف سے بیانات کے ساتھ ہی اب پریش میستا کی ہلاکت کا معاملہ انصاف کی جدوجہد کے بجائے زبانی جنگ میں تبدیل ہوتا نظر آر ہاہے۔
بلاک کانگریس صدر نے کہا کہ جب 8دسمبر 2017کو پریش میستا کی ہلاکت کے بعد بی جے پی کے ریاستی لیڈران اور کارکنان نے مانگ کی تھی کہ مقامی ڈاکٹروں کے بجائے منی پال کے ماہر ڈاکٹروں کے ذریعے پوسٹ مارٹم کرائی جائے تو اُن کی باتوں کو قبول کرتے ہوئے منی پال میں ہی پوسٹ مارٹم کرایا گیا تھا، اس کے بعد یہی بی جے پی والوں نے کہا تھا کہ ہمیں کرناٹکا حکومت اور کرناٹکا پولس پر اعتماد نہیں ہے، اس لئے اس معاملہ کو سی بی آئی کے حوالے کیا جائے، بی جے پی نے دعویٰ کیا تھا کہ سی بی آئی صرف ایک ہفتہ میں ہی انصاف دلائے گی ، بی جے پی اور کملاکر میستا کی باتوں کو قبول کرتے ہوئے سدرامیا حکومت نے فوری طورپر معاملہ کو مرکزی حکومت کی ماتحت تفتیشی ایجنسی سی بی آئی کے حوالے کردیا تھا۔
پریش میستا کی آخری رسومات انجام دینے کے بعد اسی رات بنگلورو سے وزیرآر وی دیش پانڈے ، اس وقت کے ارکان اسمبلی شاردا شٹی ، رکن اسمبلی منکال وئیدیا ، پٹن پنچایت کی نائب صدر شراوتی میستا، اور میں (جگدیپ تنگیری ) خود پارٹی کے کئی کارکنان کے ساتھ مہلوک کے گھر پہنچ کر تعزیت کی تھی ، وزیر دیش پانڈےنے مہلوک کے خاندان والوں کو ذاتی طورپر امداد دے کر حکومت کی طرف سے زائد معاوضہ کے ساتھ ساتھ مہلوک کے بھائی کو روزگار فراہم کرنے اور شفافیت کے ساتھ ہلاکت کی جانچ کرانے کا یقین دلایا تھا۔ مگر اگلے دو دنوں میں ہی پریش کے والد کملا کر میستا نے اپنا ارادہ بدل دیا تھا اور کسی کے دباؤ میں پریس کانفرنس کرتے ہوئے کہا تھا کہ ہمیں کانگریس حکومت کی طرف سے کوئی معاوضہ نہیں چاہئے ، ہمارے خاندان کو حکومت کی طرف سے کسی بھی معاوضہ یا بھیک کی ضرورت نہیں ہے۔
جب ریاستی حکومت نے معاملے کو سی بی آئی کے حوالے کیا تو معاملہ کی شفافیت کے ساتھ جانچ کرکے رپورٹ سونپناسی بی آئی کا فرض بنتا ہے۔ پوسٹ مارٹم کی رپورٹ حاصل کرنےکا اختیار بھی جانچ ایجنسی یعنی صرف سی بی آئی کو ہے ۔ اس میں کرناٹکا حکومت کا کوئی رول نہیں ہوتا۔ اسی وجہ سے بلاک کانگریس کی جانب سے پریش میستا کو انصاف دلانے کے لئے ایمانداری کے ساتھ جدوجہد کررہی ہے۔ ہمیں دکھاوے کے لئے کوئی احتجاج یا بھوک ہڑتال کرنے کی ضرورت نہیں ہے۔ انہوں نے اعلان کیا کہ آئندہ دنوں میں بھی کانگریس پارٹی میستا کی رازدارانہ ہلاکت کے ساتھ انصاف کئے جانے کامطالبہ لے کر جدوجہد کرے گی۔
خیال رہے کہ پریش میستا کی مشتبہ حالت میں ہوناور کی جس ندی سے لاش برآمد ہوئی تھی، اُس کے اطراف تین جگہوں پر سی سی ٹی وی کیمرے لگے ہوئے تھے، عوام کا ماننا تھا کہ پریش میستا کو اگرکسی نے ندی میں پھینکا ہے یا اُس کا قتل ہوا ہے تو اُس کی پوری ریکارڈنگ ندی کے اطراف لگے ہوئے ایک مندر اور ایک کوآپریٹیو بینک کے سی سی ٹی وی کیمرے میں قید ہونا لازمی ہے۔ مگر اُس تعلق سے کوئی بھی بات سامنے نہیں آئی۔