پریش میستا کے پوسٹ مارٹم کی فائنل رپورٹ ابھی نہیں ملی ۔ دیشپانڈے
کمٹہ 13؍دسمبر(ایس او نیوز) ہوناور میں فرقہ وارانہ فسادات کا سلسلہ شروع ہونے کے بعد پریش میستا نامی نوجوان کی جو لاش دستیاب ہوئی تھی اور اس سے پورے ضلع میں نفرت کی آگ بھڑکائی گئی تھی، اس تعلق سے ضلع انچارج وزیر دیشپانڈے نے کہا ہے کہ پریش کے پوسٹ مارٹم کی قطعی رپورٹ ابھی نہیں آئی ہے۔
اخباری نمائندوں سے بات چیت کے دوران وزیر موصوف نے کہا کہ جب تک قطعی رپورٹ نہیں آتی، کسی کی طرف سے بھی اس سلسلے میں تبصرے اور تجزیے کرنا درست نہیں ہے۔اس تعلق سے جو بھی ذمہ دارہوگا وہ چاہے کسی بھی پارٹی، قوم ، طبقہ اور مذہب سے کیوں نہ ہوا س کے خلاف کارروائی کی جائے گی۔ دیشپانڈے نے کہا کہ مرکزی وزیر اننت کمار ہیگڈے پریش میستا کی موت پر جو سیاست کررہے ہیں وہ صحیح نہیں ہے۔حزب اختلاف کو دستوری حد میں رہتے ہوئے بر سر اقتدار پارٹی کی کوتاہیوں پر تنقید کرنی چاہیے اس کے بجائے سماج میں تفریق اور انتشا رپید ا کرنے کا کام نہیں کرنا چاہیے اور فرقہ وارانہ اشتعال انگیزی نہیں کرنا چاہیے۔
اس موقع پر ڈی سی نکول نے کہا کہ کمٹہ میں زبردست احتجاجی ریالی کے دوران پتھراؤ کرتے ہوئے پولیس پر بھی حملہ کیاگیا تھا اس وجہ سے ضلع میں تین دنوں کے لئے ہر قسم کے احتجاج اور مظاہرے پر پابندی لگادی گئی تھی۔