بے گھر درج فہرستوں کو درخواست دیتے ہی مکان: آنجنیا
بنگلورو:23/مارچ(ایس او نیوز) ریاست بھر میں بے گھر، درج فہرست طبقات کو عرضی دیتے ہی گھر مہیا کرانے کیلئے حکومت کی طرف سے ضروری قدم اٹھائے گئے ہیں۔ یہ بات آج وزیر برائے سماجی بہبود ایچ آنجنیا نے بتائی۔ اسمبلی میں وقفہئ سوالات کے دوران ہمپنا گوڈا بادرلی کے سوال کا جواب دیتے ہوئے انہوں نے کہاکہ بے گھر درج فہرست طبقات کی طرف سے درخواست دیتے ہی گھر مہیا کرانے کیلئے حکومت نے اپنی پابندی کا اعادہ کرتے ہوئے اس مقصد کیلئے 200کروڑ روپے مختص کئے ہیں۔ سماج کے ان طبقات کو سائٹس مہیا کرانے کیلئے بھی حکومت ضروری قدم اٹھانے تیار ہے۔ اس کیلئے اگر زمین دستیاب نہ ہو تو گائڈنس ویالیو ادا کرکے حکومت زمین مہیا کرائے گی۔ انہوں نے کہاکہ بے گھر افراد کو مکان فراہم کرنے کیلئے بنگلور میں زمین کی خریداری ممکن نہیں ہے۔ اسی لئے جہاں زمین دستیاب ہو وہاں خریداری کرکے بے گھروں کو بسایا جائے گا۔ انہوں نے کہاکہ ریاستی حکومت کی طرف سے درج فہرست طبقات کو بے گھر ہونے کے مسئلے سے پریشان نہ ہونے پڑے یہ یقینی بنایا جائے گا۔