پولیس کمشنرز کی تبادلہ کارروائی میں یکطرفہ فیصلہ وزیر داخلہ ایم بی پاٹل کا وزیر اعلیٰ پر عدم اطمینان
بنگلورو26جنوری (ایس او نیوز) وزیر اعلیٰ کمار سوامی پر وزیر داخلہ ایم بی پاٹل نے عدم اطمینان کااظہار کیا ہے ۔اپنے قریبی ساتھیوں کے روبرو ناراضی ظاہر کرتے ہوئے ایم بی پاٹل نے کہا کہ ہبلی ، دھارواڑ ،بیلگاوی اور میسور شہروں کے پولیس کمشنرز کاتبادلہ کردیاجاتاہے، اور اس کی بھنک بھی مجھے نہیں لگتی ، میں وزیر داخلہ ہوں اور افسروں کے تبادلہ سے بے خبر رکھا جاتاہے ، آئی پی ایس افسروں کی تبادلہ کی کارروائی کے وقت وزیراعلیٰ کو چاہئے تھا کہ مجھ سے بات چیت کرتے لیکن ایسا نہیں ہوا ۔
وزیر اعلیٰ نے رسمی تبادلہ خیال تک نہیں کیا ، ایسی حالت ہے تو بطور وزیر داخلہ میری ضرورت کیا ہے؟ وزیراعلیٰ یکطرفہ طور پر تبادلہ کارروائی کیسے انجام دے سکتے ہیں ۔ ایم بی پاٹل نے ڈی جی پی نیلمنی راجو سے بھی سوال کیا ۔ ایم بی پاٹل کو وزیر داخلہ کا قلمدان حاصل کئے ہوئے ایک مہینہ کاعرصہ بیت رہا ہے ۔ اس درمیان بروز جمعرات وزیراعلیٰ نے آئی پی ایس افسروں کے تبادلہ کا حکمنامہ جاری کیا ۔ ہبلی ۔ دھارواڑ شہر کے کمشنر ایم این ناگراج کا تبادلہ کیا گیا ،ان کی جگہ کے جی ایف کے ایس پی بی ایس لوکیش کمار کا تبادلہ کیا ۔ بیلگاوی شہر کے کمشنر ڈی سی راجپا کی جگہ بنگلور وائر لیس ڈپارٹمنٹ کے ایس پی پی راجیندر پرساد کا تبادلہ کیا گیا ۔ اس کے علاوہ دیگر افسروں کا تبادلہ کیا گیا ہے ۔ اس معاملہ سے نالاں ایم بی پاٹل نے کمار سوامی پر ناراضی ظاہر کی ہے ۔ آئندہ ہونے والی کو آر ڈی نیشن کمیٹی اجلاس میں اس یکطرفہ فیصلہ کے سلسلہ میں آواز اٹھانے کی باتیں کی جارہی ہیں۔
کہا جارہا ہے کہ جی پرمیشور جب وزیر داخلہ تھے اس وقت بھی وزیر اعلیٰ نے مداخلت کرتے ہوئے تبادلہ کارروائی انجام دی تھی ، اس کے علاوہ وزیر اعلیٰ کے بھائی ایچ ڈی ریونا بھی اپنے محکمہ کے افسروں کے تبادلہ میں مداخلت کی تھی ۔ اس پر کانگریس کے وزراء نے ناراضی ظاہر کی تھی اور آج ایم بی پاٹل نے بھی آواز اٹھائی ہے۔