منگلورو30؍جنوری (ایس او نیوز) ہندو جن جاگرن سمیتی کے ریاستی کوآر ڈینیٹر گروپرساد گوڈا نے کہا ہے کہ سناتن سنستھا اور ہندو جن جاگرن سمیتی کے تحت ہر قیمت پر ’ہندوراشٹر‘ کی تشکیل کی جائے گی۔اور وہ اپنا مقصد پورا کرنے میں کامیاب ہوجائیں گے۔ وہ  منگلورو کے وی ٹی روڈ پر سرینواس کلیان منٹپا میں منعقدہ ایک تقریب میں  خطاب کررہے تھے۔

خیال رہے کہ ریاست کے مختلف مقامات پر 26جنوری اور 27جنوری کو ’ہندو راشٹر‘ کے قیام پر غور کرنے کے لئے سناتن سنستھا ور ہندوجاگرن سمیتی کی طرف سے ’ہندو راشٹرا جاگرتی سبھا‘‘ کے نام سے پروگرام منعقد کیے گئے تھے۔

انگریزی روزنامہ دکن ہیرالڈ کی رپورٹ کے مطابقگروپرساد گوڈانے اپنے خطاب میں  کہا کہ’’ مندروں کے چڑھاوے اور نذرانے کی رقم کو ریاستی حکومت غیر مذہبی مقاصد کے لئے استعمال کررہی ہے۔سیکولرازم کے اقدار کا پرچار صرف ہندوؤں کے درمیان کیا جاتا ہے۔ ہندوؤں کے دیوی دیوتاؤں پر تنقید کرنے والوں کے خلاف کوئی اقدام نہیں کیا جاتا۔‘‘

گوڈا نے پولیس سے مطالبہ کیا ’منگلورو مسلمس‘ نامی فیس بک پیج کے خلاف فوری کارروائی کرے جس پر ہندو دیوی دیوتاؤں کے خلاف مواد پوسٹ کیا جاتا ہے۔ گوڈا نے یہ بھی الزام لگایا کہ گوری لنکیش قتل معاملے میں جن لوگوں کوگرفتار کیاگیا ہے، وہ بے قصور ہیں اورانہیں پھنسایا گیا ہے۔ جیسے ہی وہ جیل سے رہا ہونگے ان کی عزت افزائی اور تہنیت کی جائے گی۔

اس موقع پر سری لکشمی ستیہ نارائنا ویرانجنیا سوامی مندر کے پجاری مکتا نندا سوامی اور دیگر افراد موجود تھے۔