منگلورو30؍اکتوبر (ایس او نیوز)کدرولی میں واقع قصائی خانہ کو لے کر سنگھ پریوار کی تنظیموں نے اپنی مخالفانہ مہم تیز تر کردی ہے۔ اس سلسلے کے تازہ اقدام میں بجرنگ دل، وشواہندو پریشدوغیرہ سے منسلک کارکنان نے ایک میمورنڈم جنوبی کینرا کے ڈپٹی کمشنر آف پولیس اور سٹی کمشنر آف پولیس کو دیتے ہوئے مطالبہ کیا کہ کدرولی میں واقع قصائی خانے میں بہت زیادہ بے ضابطگی ہورہی ہے۔ وہاں قانون کی پابندی نہ کرتے ہوئے گائے اور ممنوعہ جانور ذبح کیے جارہے ہیں جس کی وجہ سے اسے بند کردیا جانا چاہیے۔

ہندو شدت پسند تنظیموں کے لیڈران کا کہنا تھا کہ آر ٹی آئی کے ذریعے حاصل کی گئی معلومات کی مطابق کدرولی قصائی خانے میں گائیں قتل کی جارہی ہیں۔بھیسے اور بچھڑے غیر قانونی طور پر ذبح کیے جارہے ہیں۔ اس کے خلاف میونسپل کارپوریشن اور سٹی نارتھ پولیس اسٹیشن میں شکایت درج کرنے کے باوجود وہاں کے افسران کوئی کارروائی نہیں کررہے ہیں۔اس لئے اس معاملے میں فوری طور پر ایف آئی آر درج کی جانی چاہیے۔انہوں نے الزام لگایا کہ ہندوؤں کے جذبات مجروح کیے جانے کی بات معلوم رہنے کے باوجود سٹی کارپوریشن کمشنرکی جانب سے کوئی اقدام نہیں کیا جا رہا ہے۔‘‘

لیڈروں نے اس بات کی طرف پولیس افسران کی توجہ اس بات کی طرف مبذول کروائی کہ کدرولی قصائی خانے میں کرناٹکا میں جانوروں کے ذبیحہ پر پابندی کے قانون1964کی دفعہ 4کی خلاف ورزی کی جارہی ہے۔ اس سے قبل ماضی میں اس ذبیحہ خانے کو بند کردیا گیا تھامگر میونسپال کارپوریشن کمشنر کی جانب سے حلف نامہ داخل کیے جانے کے بعد اسے 18مہینوں کی مہلت دی گئی تھی۔یہ قصائی خانہ امسال جنوری میں دئے گئے سپریم کورٹ کے حکم کی خلاف ورزی کرتے ہوئے غیر قانونی طور پرجاری رکھا گیا ہے ۔لہٰذا اسے فوری طور پر بند کیاجانا چاہیے۔