ہند۔ چین ایک دوسرے کو شکست نہیں دے سکتے: دلائی لامہ
ممبئی:14/اگست(ایس او نیوز /آئی این ایس انڈیا) تبتی روحانی گرو دلائی لامہ نے پیر کو کہا کہ ہندوستان اور چین ایک دوسرے کو شکست نہیں دے سکتے اور دونوں ممالک پڑوسی کی طرح ساتھ رہیں گے۔ انہوں نے زور دے کر کہا کہ ہندی چینی بھائی بھائی کا احساس آگے بڑھانے کا واحد راستہ ہے۔دلائی لامہ نے کہا کہ موجودہ سرحد صورت حال میں نہ تو ہندوستان اور نہ ہی چین ایک دوسرے کو ہرا سکتے ہیں، دونوں ملک فوجی طاقت سے مالامال ہیں۔ انہوں نے کہا کہ دونوں ممالک پڑوسی کی طرح ساتھ رہیں گے۔انہوں نے کہا کہ سرحد پار فائرنگ کے کچھ واقعات ہو سکتے ہیں، یہ کوئی معنی نہیں رکھتا۔ دلائی لامہ نے ایک پروگرام کے دوران یہ بات کہی۔روحانی رہنمانے کہا کہ سال 1951 میں مقامی تبت حکومت اور جمہوریہ چین کے درمیان تبت کی آزادی کے لئے 17 نکاتی ایک معاہدے پر دستخط کیا گیا تھا۔ آج چین بدل رہا ہے اور وہ سب سے زیادہ بدھ مت آبادی والا ملک بن گیا ہے۔ہندوستان اور چین کو ’’ ہندی چینی بھائی بھائی ‘‘ کی طرف ایک بار پھر لوٹنا چاہئے۔ انہوں نے کہا کہ چین میں کمیونسٹ حکومت ہے لیکن بدھ مت کو بھی وسیع پیمانے پر تسلیم کیا جاتا ہے۔
14 ویں دلائی لامہ نے کہا کہ اس سے پہلے تبت میں دلائی لامہ روحانی اور سیاسی سرگرمیوں کی قیادت کرتے تھے لیکن سال 2011 سے میں نے مکمل طور پر سیاست سے ریٹائرمنٹ لے لیا۔ یہ اداروں کا جمہوری کرنے کا ایک طریقہ تھا، کیونکہ ان میں کچھ جاگیردارانہ عناصر بھی تھے۔انہوں نے مشورہ دیا کہ ہندوستان کوبدھ مت ماننے والے چینی لوگوں کے لئے ادارہ تیار کرنا چاہئے ۔روحانی رہنما نے کہا کہ ہمیں ضرور چین میں بدھ مت کے پیروکاروں کو سمجھنا چاہئے جو واقعی نالندہ اور سنسکرت سے آئے ہندوستانی بدھ مت کے اصولوں کو مانتے ہیں۔ انہوں نے کہاکہ ہندوستان کو بدھ مت ماننے والے چینی لوگوں کے لئے جگہ تیار کرنی چاہئے۔ یہ لوگ بودھ گیا جیسی جگہوں پر آ سکتے ہیں اور جذباتی طور پر بھی ہندوستان کے قریب آ سکتے ہیں۔