ملک کی اولین خاتون فلائیٹ انجینئر ہینا جیسوال
بنگلورو،17؍فروری (ایس او نیوز) فلائیٹ لیفٹننٹ ہینا جیسوال (27) نے ملک کی اولین خاتون فلائیٹ انجینئر بن کر تاریخ رقم کی ہے۔ انہوں نے یہاں یلہنکا کے ایر فورس اسٹیشن سے ملحق 112؍ ہیلی کاپٹر یونٹ سے فلائیٹ انجینئرنگ کا کورس کامیابی کے ساتھ مکمل کیا۔اس کورس کے لئے منتخب ہونے سے قبل وہ مختلف عہدوں پر تھیں۔ہینا کو بروز جمعہ فلائیٹ انجینئر کی ونگ فراہم کی گئی۔گزشتہ 6؍ ماہ کے دوران ہوئی سخت تربیت کے دوران انہو ں نے بہترین مظاہرہ کیا۔
وزارت دفاع کی جانب سے جاری اخباری بیان میں اس بات کی اطلاع دی گئی ہے۔ہینا کا تعلق چنڈی گڑھ سے ہے اور انہوں نے پنجاب یونیورسٹی سے بیچلر آف انجینئرنگ (بی ای ) کورس کیا تھا۔ڈی کے جیسوال اور انیتا جیسوال کی اکلوتی بیٹی ہینا نے اسے ’خواب کا شرمندۂ تعبیر ہونا‘قرار دیا ہے۔بچپن ہی سے ان کی خواہش تھی کہ فوجی وردی پہنیں اور آسمانوں میں اڑیں۔اب یہ خواہش پوری ہوئی ہے۔