نئی دہلی،3 جنوری (ایس او نیوز؍آئی این ایس انڈیا)حکومت نے گذشتہ تین دہائی سے بھی زیادہ وقت سے سرد خانے میں پڑے آسام سمجھوتے کو موثر طورپر نافذ کرنے کے طریقہ کار کا مشورہ دینے کے لیے ایک اعلیٰ سطحی کمیٹی قائم کی ہے۔حکومت نے بوڈو فرقہ سے متعلق زیر التوا مسائل کو حل کرنے کے لیے بھی کئی اقدامات اٹھانے کافیصلہ لیاہے ۔وزیر اعظم نریندر مودی کی صدارت میں آج یہاں ہوئی مرکزی کابینہ کی میٹنگ میں ان فیصلوں سے متعلق تجاویز کو منظوری دی گئی۔ میٹنگ کے بعد مرکزی وزیر داخلہ راج ناتھ سنگھ نے نامہ نگاروں کو بتایا کہ مرکز، آسام حکومت اور آل آسام اسٹوڈنٹس یونین (آسو) نے 15 اگست 1985 کو آسام معاہدہ پر دستخط کیے تھے لیکن35 سال گذر جانے کے باوجود یہ موثر طورپر نافذ نہیں ہوپایا ہے۔ انہوں نے کہا کہ حکومت نے اس کے موثرعمل درآمدکا فیصلہ کیا ہے اور اس کے لئے ایک اعلی سطحی کمیٹی تشکیل دی ہے۔ کمیٹی اس معاہدہ کے دفعہ 6کا پورا جائزہ لے گی اور اپنی سفارشات دے گی۔ کمیٹی کا ڈھانچہ اور اس کی خدمات کی شرطوں کے بارے میں دو تین دن میں اطلاع عام کردی جائے گی۔ایک سوال پر انہوں نے کہا کہ کمیٹی میں آسام کے لوگوں کی بھی نمائندگی ہوگی۔