مکہ مسجد معاملہ میں تمام ملزمان کے بری ہونے کے بعد حیدرآباد میں الرٹ
حیدرآباد ،16؍اپریل (ایس او نیوز؍ آئی این ایس انڈیا ) حیدرآباد کے مکہ مسجد میں 2007 میں ہوئے بم دھماکے کیس میں سوامی اسیمانند سمیت تمام ملزمان کے بری ہونے کے بعد پولیس نے حیدرآباد میں الرٹ جاری کیا ہے۔پولیس نے فرقہ وارانہ طور پر حساس شہر کے پرانے علاقے میں سیکورٹی بڑھا دی ہے۔سیکورٹی کے نظام کے طور پر پولیس اور نیم فوجی دستوں کے 3,000سے زیادہ جوانوں کو تعینات کیا گیا ہے۔قومی جانچ ایجنسی (این آئی اے)کی خصوصی عدالت نے آج 11 سال پرانے اس معاملے میں سوامی اسیمانند سمیت چارج شیٹ کئے گئے 8 ملزمان کو بری قرار دیا۔کورٹ نے ثبوتوں کی عدم موجودگی کا حوالہ دیتے ہوئے ملزمان کو بری کر دیا۔سینئر پولیس افسر مشہور چارمینار کے پاس واقع تاریخی مسجد کی سیکورٹی کے نظام کی نگرانی کر رہے ہیں۔ڈی سی پی وی ستیہ نارائن نے کہا کہ پولیس نے کسی بھی ناخوشگوارواقعہ کو روکنے کے لئے تمام ضروری اقدامات کئے ہیں۔انہوں نے کہا کہ پولیس حساس جگہوں پر سی سی ٹی وی کیمرے کے ذریعہ لوگوں کی سرگرمیوں پر نظر رکھے ہوئے ہیں۔انہوں نے کہا کہ قانون اور نظام کو خراب کرنے والوں کے خلاف سختی سے پیش آئے گی۔این آئی اے کی خصوصی عدالت نے استغاثہ کے الزامات کو ثابت کرنے میں ناکام رہنے پر دائیں بازو ہندو گروپ ابھینوبھارت کے تمام پانچوں اراکین کو بری قرار دیا ہے۔بتا دیں کہ 18 مئی 2007 کو مشہور چارمینار کے پاس جمعہ کی نماز کے دوران مکہ مسجد میں ہوئے دھماکے میں نو افراد کی موت ہو گئی تھی اور 58 افراد زخمی ہو گئے تھے۔اس واقعہ کے بعد مسجد کے باہر مظاہرہ کر رہے لوگوں پر پولیس فائرنگ میں پانچ اور لوگوں کی موت ہوئی تھی۔