اُڈپی:4/ستمبر(ایس اؤ نیوز) منی پال ایم آئی ٹی کے شعبہ کمپیوٹر سائنس ان ڈپلوما میں سال اول میں زیر تعلیم دھنوش اور منی پال جونئیر کالج کے ہائی اسکول شعبہ میں 8ویں جماعت میں پڑھائی کررہے درشن کو اپنی تعلیم جاری رکھنا مشکل ہورہاتھا کیونکہ دونوں بھی اپاہج ہیں ۔ دونوں غریب بچوں کی معاشی کمزوری کو دیکھتے ہوئے جماعت اسلامی ہند اُڈپی اور منگلوروکی جانب سے انہیں وھیل چئیر اور لیپ ٹیپ کا عطیہ دے کر ان کی تعلیمی زندگی میں نئی روشنی پیدا کرنے کی کوشش کی ہے۔
منی پال سرلبیٹو علاقے میں گنیش باگ کے مکین پرمیلا پجاری کے یہ دونوں بچے اپاہج ہیں، ان دونوں کے علاج کے لئے کافی کوشش کی گئی لیکن کوئی فائدہ نہیں ہوا۔ اب یہ دونوں بچے دوسروں کے سہارے زندگی گزارنے پر مجبور ہیں۔ سرکارکی طرف سے منظور کردہ گھر میں ر ہتے ہیں ۔ ان بچوں کو کندھے پر لے کر پہاڑ چڑھ کر پیدل راستے سے آجایا کرتے تھے۔ دونوں بچے ہونہار اور ذہین ہونےسے گھر میں ہی بیٹھ کر کمپیوٹر کے ذریعے کوئی روزگار شروع کرنےکا خیال تھا۔ انہی حالات کودیکھتے ہوئے جماعت اسلامی ہند کی طرف سے دونوں کو ایک ایک لیپ ٹیپ اور وھیل چئیر ان کے گھر پہنچ کر انہیں منتقل کیاگیا ۔
اس موقع پر جماعت اسلامی ہند اُڈپی کے ناظم ضلع شبیر ملپے، سومپا کوٹیان سرلبیٹو،ادریس ہوڑے، اُڈپی جماعت کے امیر مقامی عبدالعزیز ، ویلفئیر پارٹی کے عبدالعزیز ادیاور، ریاض احمد ، فیروز منا، نثار احمد، ایس آئی اؤ اُڈپی کے صدر فاضل ، عبدالسمیع وغیرہ موجود تھے۔