خلیج سے واپس لوٹنے والوں کے لئے منگلورو میں ’ہیلپ ڈیسک‘ کی تجویز
منگلورو 4؍ستمبر (ایس او نیوز)وزیر برائے شہری ترقیات وہاوسنگ یو ٹی قادر نے بتایا کہ خلیج ملازمت گنوا کر واپس لوٹنے والے جنوبی کینرا کے افراد کی رہنمائی اور تعاون کے لئے منگلورو میں ایک ’ہیلپ ڈیسک‘ والا سنٹرقائم کرنے کی تجویز زیر غور ہے۔
وزیر موصوف نے اخباری کانفرنس سے خطاب کرتے ہوئے کہا:’’ اس ضمن میں جلد ہی ڈپٹی کمشنر کو تجویز بھیج دی جائے گی۔یہ سنٹرڈپٹی کمشنر کے دفتر میں یا پھر کسی او مناسب جگہ پر قائم کیا جائے گاجہاں ایسے افراد کی تعلیمی اور پیشہ ورانہ قابلیت اور عملی تجربے سے متعلق تمام تفصیلات درج کرلی جائیں گی جو ملازمتیں گنوا کر وطن واپس لوٹے ہیں۔اس سے ضلع انتظامیہ کو مستقبل میں ان کی اہلیت کے مطابق بازآبادکاری کے منصوبے بنانے میںآسانی ہوگی ۔‘‘
یو ٹی قادر نے بتایا کہ وہ جلد ہی اڈپی ڈسٹرکٹ انچارج منسٹر جیا مالا رامچندرا سے بھی بات چیت کریں گے تاکہ اسی قسم کا ایک سنٹر اڈپی ضلع میں بھی قائم کیا جاسکے۔
خیال رہے کہ سعودی عربیہ کی طرف سے وہاں کے شہریوں کولازمی طور پر ملازمتیں فراہم کرنے کی جو پالیسی اپنائی گئی ہے اس سے لاکھوں غیر وطنی افراد کو اپنی نوکریوں اور روزگار سے ہاتھ دھونا پڑا ہے اور اپنے اپنے وطن کو واپس لوٹ آنے کا سلسلہ چل پڑا ہے۔