سرسی 5؍مارچ (ایس اونیوز) میڈیا میں گردش کررہی خبر کے مطابق مرکزی وزیر برائے اسکل ڈیولپمنٹ اننت کمار ہیگڈے نے اپنے گھر پر ایک شخص کی پیٹائی کردی ہے، لیکن اس معاملے میں پولیس میں کوئی شکایت درج نہیں کی گئی ہے۔

تفصیل یہ بتائی جاتی ہے کہ مضافاتی علاقوں میں بجلی کنکشن فراہم کرنے کی دین دیال اپادھیااسکیم کے تحت ممبئی کی بجاج الیکٹرانکس کمپنی کو ٹھیکہ دیا گیا ہے۔ وزیر اننت کمار ہیگڈے نے اس کمپنی کے برانچ منیجرکو اتوار کے دن اپنے گھر طلب کرکے جوئیڈا تعلقہ کے بازار کوننگ گرام میں بجلی کنکشن فراہم کرنے میں ہورہی تاخیر کے بارے میں پوچھ تاچھ کی۔گرماگرم بحث کے دوران طیش میں آکر اننت کمار نے منیجر پر مبینہ طور پر جان لیواحملہ کردیا۔

معلوم ہوا ہے کہ زخمی منیجر کو سرکاری اسپتال میں طبی امداد فراہم کی گئی اور اعلیٰ پولیس افسرا ن کی مداخلت سے اس مارپیٹ کے معاملے کو رفع دفع کردیا گیا اور پارٹی کارکنان نے مارکھانے والے بجاج کمپنی کے منیجرکو بی جے پی کارکنان نے خودہی ہبلی تک واپس پہنچادیا۔ایک خبر یہ بھی ہے کہ اس واقعے کے سلسلے میں سرسی مارکیٹ پولیس اسٹیشن میں حملے کا شکار ہونے والے منیجر کو طلب کرکے اس کا بیان درج کرلیا گیا ہے مگر کیس داخل نہیں ہوا ہے۔

یاد رہے کہ گزشتہ دو سال قبل اپنی ماں کے علاج کے تعلق سے بے اطمینانی ظاہر کرتے ہوئے اننت کمار ہیگڈے نے سرسی کے ٹی ایس ایس اسپتال میں ڈاکٹروں پر حملہ کردیا تھاجس کا ریاستی اور نیشنل میڈیا میں بڑا چرچا ہوا تھا۔ لگتاہے کہ اب اس تازہ معاملے کو مقامی طور پر ہی دبادینے کی کوشش کی گئی ہے۔