مینگلور کے قریبی تعلقہ بیلتنگڈی اور پُتور میں زبردست بارش؛ راستے جھیل اور تالاب میں تبدیل؛ اسکولوں میں چھٹی کا اعلان؛ وزیردیشپانڈے کا متاثرہ علاقوں کا دورہ
مینگلور 14/جون (ایس او نیوز) ضلع دکشن کنڑا کے بیلتنگڈی، سولیا اور پُتور میں آج جمعرات کو ہوئی زبردست بارش سے کئی راستے جھیل اور تالاب میں تبدیل ہوگئے ہیں اور کئی علاقوں میں سیلاب کی سی صورتحال پیداہوگئی ہے۔ بارش نے عام زندگی کو درہم برہم کردیا ہے، جبکہ اکثر سڑکیں پانی میں ڈوب جانے کی وجہ سے سواریوں کی آمد ورفت میں زبردست رکائوٹ پیدا ہوگئی ہے۔
زبردست بارش اور سیلابی صورتحال کو دیکھتے ہوئے اسکولوں اور کالجوں میں چھٹی کا اعلان کیا گیا ہے ۔جبکہ شدید بارش سے کھیت کلیان کو زبردست نقصان پہنچا ہے۔
بارش سے ہوئے نقصانات کا جائزہ لینے اور بارش سے متاثرہ علاقوں کا دورہ کرنے ریاست کے مالگذاری وزیرآر وی دیش پانڈے مینگلور پہنچ گئے ہیں اور متاثرین کو امدادی چیک فراہم کی ہے۔
بارش متاثرین کو امدادی چیک تقسیم: مینگلور میں گذشتہ کچھ دنوں سے جاری بھاری بارش کے نتیجے میں جن مکانات کو نقصان ہوا تھا اور جن لوگوں کے مکانات مکمل طور پر منہدم ہوگئے تھے ، اُن متاثرین کو آر وی دیش پانڈے نے امدادی چیک تقسیم کئے انہوں نے کہا کہ ضلع دکشن کنڑا میں کئی مکانوں کو نقصان پہنچا ہے، ہر ایک کو سرکار کی طرف سے امداد دی جائے گی، اسی طرح بارش سے دیگر اضلاع کے متاثرین کو بھی امداد فراہم کی جائے گی۔ دیش پانڈے نے کہا کہ جو لوگ کرائے کے مکانوں پر رہتے ہیں اُن متاثرین کو بھی سہولیات فراہم کی جائے گی۔ دیش پانڈے نے مزید کہا کہ ضلع جنوبی کینرا اور اُڈپی میں اب تک تین کروڑ روپیوں کی امداد ریلیز کی گئی ہے۔
دیش پانڈے نے بتایا کہ چارماڑی گھاٹ پر متعدد مقامات پر چٹانیں کھسکنے کی وجہ سے سڑک فی الحال بندکردی گئی ہے اور راستوں کو صاف کرنے کا کام جاری ہے۔کام مکمل ہونے کے بعد راستوں کو سواریوں کے لئے دوبارہ کھولا جائے گا۔
