گنا،23؍اگست(ایس او نیوز؍ آئی این ایس انڈیا )مدھیہ پردیش میں شدید بارش سے ریاست کے کئی علاقے بری طرح متاثر ہوئے ہیں۔ محکمہ موسمیات نے گوالیار، مندسور، راج گڑھ، نیمچھ، مرینہ اور گْنا سمیت کئی اضلاع میں بارش سے متعلق الرٹ جاری کیا گیا ہے۔ اِس دوران بارش سے متعلق حادثات میں بھوپال ضلع میں 12 افراد کی موت ہوئی ہے، مندسور میں چار افراد ہلاک ہوئے ہیں، جبکہ رائے سین ضلع میں دو افراد کی موت کی خبر ہے۔

پچھلے دو دن سے جاری مسلسل بارش کے سبب ودیشا، رائے سین اور مندسور کے بہت سے گاؤں زیرآب ہوگئے ہیں۔ کئی دریا اب بھی خطرے کے نشان سے اوپر بہہ رہے ہیں۔ بھوپال سمیت کئی اضلاع میں پوری رات شدید بارش کی وجہ سے نشیبی علاقوں میں پانی بھرگیا ہے۔ اِس کی وجہ سے کئی علاقوں میں بجلی کی سپلائی بھی متاثر ہوئی ہے۔ بھوپال میں ڈیزاسٹر مینجمنٹ سینٹر میں ریاستی سطح کا ایک کنٹرول روم پہلے ہی قائم کیا جاچکا ہے۔

ادھر کیرل میں بچاؤ کام ختم ہوگیا ہے اور اب راحتی کاموں پر توجہ مرکوز ہے۔ ریاست میں سیلاب سے مرنے والوں کی تعداد بڑھ کر 228 ہوگئی ہے۔ دس لاکھ سے زیادہ لوگ اب بھی راحتی کیمپوں میں پناہ لیے ہوئے ہیں۔ کچھ پہاڑی علاقوں کو چھوڑ کر تقریباً تمام جگہوں پر سڑک، ریل اور ہوائی خدمات دوبارہ شروع ہوگئی ہیں۔