چکمگلورو میں بھاری بارش، درخت گرنے سے ایک خاتون ہلاک، دیہی علاقوں میں بجلی کی فراہمی متاثر، اسکولوں اورکالجوں میں چھٹی
چکمگلورو:20/جولائی (ایس او نیوز) ساحلی علاقے کی طرح چکمگلورو ضلع میں بھی گزشتہ چار دنوں سے مسلسل موسلادھار بارش ہونے کی وجہ سے عام زندگی کے معمولات متاثر ہونے کی خبریں ملی ہیں۔ موصولہ تفصیل کے مطابق کلسا نامی مقام پر ایک بڑا درخت اپنی جڑوں سے اکھڑ کر گرگیا جس کی زد میں آنے والی بھاگیہ (۳۳سال) ہلاک ہوگئی ہے۔کہتے ہیں کہ صبح سویرے یہ خاتون اپنے دو بچوں کو اسکول پہنچانے کے لئے نکلی تھی۔ راستے میں تیز ہوا کے ساتھ بارش شروع ہوگئی اور درخت اکھڑ کرراستے پر گرگیا۔ اس سے بھاگیہ بہت زیادہ زخمی ہوگئی تھی جسے کلسا اسپتال میں ابتدائی علاج کے بعد مزید علاج کے لئے منگلوروکے روانہ کیا گیا۔ لیکن بدقسمتی سے وہ زخموں کی تاب نہ لاکر موت کے منھ میں چلی گئی۔جبکہ اسکول کے لئے اس کے ساتھ نکلے ہوئے دونوں بچوں کو کوئی نقصان نہیں پہنچا ہے۔ بھاگیہ کے شوہر سنتوش نے اس واقعہ کے تعلق سے کلسا پولیس اسٹیشن میں شکایت درج کروائی ہے۔
دوسری طرف بھدراندی کے اوپرسے گزرتے ہوئے کلسا اور کُدرے مکھ کو جوڑنے والا پُل پوری طرح پانی میں ڈوب جانے کی اطلاع ہے۔جس کی وجہ سے مسافروں اور مقامی افراد کی آمد ورفت میں بڑی رکاوٹ پیدا ہوگئی ہے۔موڈگیرے تعلقہ میں ہیما وتی اور جپاوتی ندیوں میں طغیانی آئی ہوئی ہے۔تیز بارش کی وجہ سے ایک اسکول کمپاونڈ کی دیوار گرگئی ہے۔موڈیگیرے میں ہی سرکاری بس اسٹانڈ کے اندر موجود ایک بڑا درخت قریب میں واقع اسکول کے بیت الخلا پر گرنے سے کافی نقصان ہوا ہے۔بھاری مقدار میں بارش برسنے کی وجہ سے بہت سارے مقامات پر چاول کے کھیت ندیوں میں تبدیل ہوگئے ہیں۔
بشمول چکمگلورو، موڈیگیرے، کوپّا، این آر پور، شرنگیری وغیرہ تعلقہ جات میں کئی مقامات پربجلی کے تاروں اور کھمبوں پر درخت ٹوٹ کر گرنے سے ان علاقوں میں بجلی کی فراہمی متاثر ہوئی ہے۔مسلسل اور بھاری بارش کا سلسلہ جاری رہنے کے پیش نظرچکمگلورو کے کئی تعلقہ جات میں سرکاری و نجی تعلیمی اداروں کو چھٹی کا اعلان کردیا گیا ہے۔