ساحلی کرناٹکا میں مانسون کی دھماکے دار آمد؛ پورے خطہ میں طوفانی ہوائوں کے ساتھ زور دار بارش؛ کارگیدے میں روڈ بہہ گیا؛ مینگلور میں مندر پر درخت گرنے سے چار زخمی

Source: S.O. News Service | By I.G. Bhatkali | Published on 9th June 2018, 2:32 PM | ساحلی خبریں |

بھٹکل 9/جون (ایس او نیوز) ساحلی کرناٹکا کے اضلاع  اُترکنڑا،اُڈپی اور دکشن کنڑا میں اس بار  مانسون  کی دھماکے دار آمد ہوئی ہے جس کے ساتھ ہی  تینوں ساحلی اضلاع میں طوفانی ہوائوں کے ساتھ زور دار بارش کا سلسلہ جاری ہے جس سے عام زندگی مفلوج ہوکر رہ گئی ہے۔ موسلادھار بارش سے لوگوں کو   گھروں سے نکلنے میں دشواری ہورہی ہے تو وہیں دوسری طرف  بارش کی وجہ سے دکانوں میں گاہک بھی نہیں آرہے ہیں، جس سے کاروبار بھی کافی متاثر ہوا ہے۔

بھٹکل میں روڈ بارش کی نذر:   دو دنوں کی مسلسل بارش سے بھٹکل کے کارگیدے مسجد مزمل کے سامنے والی پوری سڑک بارش کی نذر ہوگئی ہے۔ زوردار بارش یہاں کی پوری سڑک کو اپنے ساتھ بہالے گئی ہے، جس کے نتیجے میں  اس سڑک پر عوام کا چلنا پھرنا دوبھر ہوگیا ہے۔  راستہ بے حد خراب ہونے کی وجہ سے مسجد میں نمازیوں کی تعداد پر بھی کافی اثر پڑا ہے، جبکہ روڈ پر سواریوں کا  گذر بند ہوگیاہے۔ عوام نے  مقامی تحصیلدار پر زور دیا ہے کہ وہ فوری طور پر سڑک کی مرمت کرکے سڑک کو استعمال کے قابل بنائیں۔ عوام نے مقامی سماجی اداہ مجلس اصلاح وتنظیم بھٹکل سے بھی درخواست کی ہے کہ وہ علاقہ کے پنچایت ممبر پر زور ڈالیں کہ وہ  یہاں پر منظور کئے گئے کانکریٹ روڈ  کی فوری تعمیر کو یقینی بنائیں، جس کے  لئے  چھ ماہ قبل ہی  اُس وقت کے وزیراعلیٰ سدارامیا نے فنڈ ریلیز کئے جانے کا عوامی اجلاس میں اعلان کیا تھا، مگر اتنا عرصہ گذرنے کے بائوجود سڑک کی تعمیر کا کام رُکا ہوا ہے۔

مکان پر درخت گرنے سے گھر کو نقصان:  طوفانی بارش کے نتیجے میں آج سنیچر کوبھٹکل تعلقہ کے مُٹھلی گرام پنچایت حدود کے تلاند میں ایک مکان پر کاجو کا درخت  گرنے سے گھر کی چھت کو نقصان پہنچا ہے۔ نقصان کا تخمینہ قریب بیس ہزار روپیہ لگایا گیا ہے۔ محکمہ روینو کے آفسران نے موقع پر پہنچ کر نقصانات کا جائزہ لیا ہے۔

بھٹکل میں ایک رمضان باکڑہ کی چھت اُڑگئی: یہاں بھٹکل ماری کٹہ میں ایک رمضان باکڑا کی چھت  طوفانی ہوائوں سے اُڑگئی، البتہ کسی کو نقصان نہیں پہنچا۔  بتایا گیا ہے کہ جمعہ کی شام کو جیسے ہی طوفانی ہواوں کےساتھ بارش شروع ہوئی،  ایک باکڑا کی چھت کے لئے استعمال کئے گئے شیٹ اپنی جگہ سے اُکھڑ گئی اور نیچے جاگری، یہ تو اچھا ہوا کہ اُس وقت قریب میں کوئی  گاہک نہیں تھے، ورنہ  شیٹ کا اس طرح گرنا خطرناک ثابت ہوسکتا تھا۔

مینگلور میں  گھنا درخت گرنے سے مندر کو نقصان ، چار زخمی:  مینگلور میں جمعہ کی شام کو ہوئی طوفانی بارش کے نتیجے میں مینگلور کے تاریخی  منگلادیوی مندر پر پیپل کا گھنا درخت گرنے سے نہ صرف مندر کو نقصان پہنچاہے بلکہ اس کی زد میں آکر چار لوگ بھی زخمی ہوئے ہیں، جن کی شناخت سُریکھا (63)، پروین سورنا (49) ، نوین (45) اور تیجسوینی (20) کی حیثیت سے کی گئی ہے۔ چاروں کو کافی چوٹیں آنے کی وجہ سے مختلف اسپتالوں میں داخل کیا گیا ہے۔ ذرائع کے مطابق  مندر کے باہر رکھی ہوئی ایک کار کو بھی درخت گرنے سے نقصان ہوا ہے۔ موسلادھار بارش کو دیکھتے ہوئے آج سنیچر کو مینگلور کے اکثر  اسکولوں اور کالجوں میں چھٹی کا اعلان کیا گیا ہے۔

کل سے جاری موسلادھار بارش سے آج سنیچر کو مینگلور میں کئی علاقوں میں درخت اُکھڑنےکی واردات پیش آئی ہیں،سورتکل میں ایک قدم مکان پر درخت گرنے سے پورا مکان منہدم ہوگیا ہے، اسی طرح  مینگلور کے بھوانی اسٹریٹ اور نہرو میدان میں بھی درختوں کے گرنے سے نقصانات ہوئے ہیں۔

 

اُڈپی میں بھی موسلادھار بارش:  پڑوسی ضلع اُڈپی میں بھی طوفانی ہوائوں کےساتھ زوردار بارش کا سلسلہ جاری رہا، جس کو دیکھتے ہوئے آج سنیچر کو اسکولوں میں چھٹی کا اعلان کیا گیا ہے۔ موسلادھار بارش سے عام زندگی درہم برہم ہوگئی ہے اور لوگ گھروں کے اندر ہی دبک گئے ہیں۔ بارش سے کئی نشیبی علاقوں میں پانی جمع ہوجانے کی اطلاعات ہیں، البتہ کسی بھی طرح کے نقصانات کی کوئی خبر نہیں ہے۔

انکولہ میں  الیکٹرک وائر گرنے سے تین گائے ہلاک: موسلادھار بارش کے دوران ضلع اُترکنڑا کے انکولہ تعلقہ کے الگیری دیہات میں الیکٹرک وائر ٹوٹ کر گرنے کے نتیجے میں تین گائے ہلاک ہونے کی واردات پیش آئی ہے۔ بتایا گیا ہے کہ سنیچر صبح طوفانی ہواوں کے ساتھ بارش جاری تھی کہ اچانک بجلی دوڑنے والی الیکٹرک وائر کھمبے سے الگ ہوکر نیچے گری۔ بتایا گیا ہے کہ اُس وقت کافی جانور چررہے تھے، جس میں سے تین گائیوں پر وائر گرنے سے تینوں گائے موقع پر ہی ہلاک ہوگئیں۔ ذرائع نے بتایا کہ کافی چہل پہل والے علاقے میں یہ واردات پیش آئی ہے، یہ تو اچھا ہوا کہ یہ وائر کسی راہگیر پر نہیں گری، ورنہ  انسانی جان بھی جاسکتی تھی ۔

کاروار ، کمٹہ، ہوناور  میں بھی بارش:   اُدھر ضلع اُترکنڑا کے کاروار، انکولہ، کمٹہ، ہوناور ، یلاپور، ہلیال اور سرسی میں بھی دو روز سے موسلادھار بارش کا سلسلہ جاری ہے،  کئی علاقوں میں بارش سے درختوں کے مکانوں پر گرنے  اور الیکٹرک سروس متاثر ہونے کی اطلاعات ہیں، البتہ دیگر کسی نقصان کی کوئی خبر نہیں ہے۔

ایک نظر اس پر بھی

یلاپور میں بائیک پھسل گئی، دو شدید زخمی

یلاپور 17 جون (ایس او نیوز) ضلع اتر کنڑا کے یلاپور نیشنل ہائی وے 63 پر ایک بائیک تیز رفتاری کے ساتھ پھسلنے کے نتیجے میں بائیک پر سوار دو لوگ بری طرح زخمی ہو گئے۔ جن کی شناخت ہبلی گنیش پیٹ کے رہنے والے محمد شاہد موراک (21) اور محمد نعیم (23) کی حیثیت سے کی گئی ہے۔

بھٹکل: مرڈیشور سمندر میں ڈوبنے والے ایک سیاح کو لائف گارڈ نے دی نئی زندگی

تعلقہ کے سیاحتی مقام مرڈیشور میں آج بنگلور کے ایک سیاح کو لائف گارڈ نے   ڈوبنے سے بچالیا اور ایک نئی زندگی عطا کی جس کی شناخت  یوراج (36) کی حیثیت سے کی گئی ہے۔ وہ بنگلور کے سری رام پورا کا رہنے والا ہے۔

دبئی ۔مینگلور ایئر انڈیا فلائٹ کوچی ایئر پورٹ کی طرف موڑ دیا گیا۔ عید کے لئے مینگلور پہنچنے والے مسافروں نے کیا رن وے پر احتجاج

دبئی سے آنے والی ایئر انڈیاایکسپریس فلائٹ AIE 814کومنگلورو ایئر پورٹ کے بجائے کوچی ایئر پورٹ پر لینڈ کرانے سے ناراض مسافروں نے کوچی ایئر پورٹ کے رن وے پر احتجاجی مظاہرہ کیا اور ایئر انڈیا کے کوتاہی اور غفلت پر سخت برہمی کا اظہار کیا۔

بیندوراوتینانی میں پہاڑی کا کھسکنا شاہراہ کی تعمیراتی کمپنی کے لئے دردِسر۔ حل تلاش کرنے کمپنی پہنچی راگھویندرا مٹھ میں!

نیشنل ہائی وے توسیعی منصوبے کے تحت بیندور کے وتّی نینی علاقے میں پہاڑکو کاٹ کر راستہ بنانے کا کام رکاوٹوں کا شکار ہوتاجارہا ہے کیونکہ یہاں بار بار پہاڑی چٹانیں کھسکنے کے واقعات پیش آرہے ہیں۔ حالانکہ ٹھیکیدار کمپنی اس سے پہلے پنچاب، کشمیر اور ممبئی وغیرہ میں بہت ہی کٹھن حالات ...

اُڈپی میں بجرنگ دل کارکنوں کے حملہ میں ہلاک ہونے والے حسین ابّا کی موت کا سبب سر پر لگنے والی چوٹ۔ پوسٹ مارٹم رپورٹ میں انکشاف

ہیری اڈکا پولیس اسٹیشن کی حدود میں پیراڈور کے مقام پر مویشیوں کے تاجر حسین ابّا اور اس کے ساتھیوں کی گاڑی روک کر پولیس اور بجرنگ دل کارکنان کی ملی بھگت سے 30مئی کو صبح کی اولین ساعتوں میں جو حملہ ہوا تھا اوراس کے بعد ایک پہاڑی علاقے سے حسین ابا کی لاش برآمد ہوئی تھی اس معاملے کی ...

بھٹکل میں پورے جوش و خروش کے ساتھ عید الفطر منائی گئی؛ مولانا عبدالعلیم ندوی اور مولانا خواجہ مدنی کا نوجوانوں سے پرزور خطاب

ساحلی کرناٹک کے شہربھٹکل سمیت کمٹہ،  بیندور، کنداپور،  کنڈلور، گنگولی، اُڈپی،  مینگلور اور پڑوسی ساحلی ریاست کیرالہ میں آج جمعہ کو پورے جوش و خروش کے ساتھ عید الفطر  منائی گئی۔