بنگلورو،16؍اکتوبر(ایس او نیوز؍عبدالحلیم منصور) ریاست بھر میں بارش کی تباہ کاریوں کا سلسلہ رکنے کا نام نہیں لے رہا ہے۔ گدگ میں بارش کے سبب تین اموات ہوئیں ، جبکہ بیدر میں بجلی گرنے سے ایک ہی خاندان کے تین افراد ہلاک ہوگئے، جبکہ کلبرگی میں ایک شخص کی اسی طرح موت ہوگئی۔ گدگ ضلع بھر میں موسلادھار بارش کے سبب بھاری تباہی مچی ہے، یہاں کے گجیندرا گڑھ میں دیر رات ایک مکان کی چھت گرنے سے گہری نیند میں سوئی ہوئی بوڑھیا اور اس کے دو پوتیاں ڈھیر ہوگئے۔ان کی شناخت 56سالہ محبوب بی، 8سالہ مسکان اور دس سالہ نازیہ کی حیثیت سے کی گئی ہے۔ اس خاندان کے ایک اور فرد دامن صاب گھر سے باہر گئے ہوئے تھے کہ خوش قسمتی سے بچ گئے۔ یہاں کے بلدیہ کے چیف آفیسر ہنومنتیا نائک نے جائے وقوع کا دورہ کیا اور نعشوں کو گجیندرا گڑھ اسپتال پہنچا یا۔ بیدر ضلع کے بسوا کلیان تعلقہ کے لاڈونتی دیہات میں ایک ہی خاندان کے تین افراد بجلی گرنے کے سبب ہلاک ہوگئے ، مہلوکین کی شناخت کیشو، بابا راؤ، اور لکشمی بائی کی حیثیت سے کی گئی ہے۔ بتایا جاتا ہے کہ یہ لوگ زرعی مزدور تھے، کام ختم کرکے گھر لوٹ رہے تھے کہ بجلی کی زد میں آگئے۔ ان کی نعشیں بیدر ضلع اسپتال پہنچادی گئی ہیں۔