ساحلی کرناٹکا میں زوردار بارش کا سلسلہ جاری؛ کل منگل کو اُڈپی سمیت بھٹکل ،کاروار وغیرہ اسکولوں میں بچوں کو چھٹی کا اعلان؛ ٹیچروں کو دینی ہوگی حاضری
بھٹکل 13/اگست (ایس او نیوز) ساحلی کرناٹکا بالخصوص مینگلور، اُڈپی،کنداپور، بھٹکل، کمٹہ، کاروار سمیت تینوں اضلاع کے تمام تعلقوں میں زوردار بارش کا سلسلہ جاری ہے جس سے مختلف مقامات سے نقصانات کی خبریں موصول ہورہی ہیں۔ بھاری بارش کو دیکھتے ہوئے کل منگل کو بھی ضلع اُڈپی میں ڈپٹی کمشنر پریا میری فرانسس نے اسکولوں اور کالجوں میں چھٹی کا اعلان کیا ہے۔اُدھر ضلع جنوبی کینرا کے مینگلور سمیت تمام تعلقہ جات میں بھاری بارش جاری رہنے کی اطلاعات ملی ہیں۔جبکہ آج پیر کو بھٹکل سمیت ضلع شمالی کینرا میں بھی زوردار بارش شروع ہوگئی ہے۔
ضلع شمالی کینرا میں صبح سے جاری زبردست بارش کو دیکھتے ہوئے ضلع کے ڈپٹی کمشنر ایس ایس نکول نے ضلع کے سرسی، سداپور، یلاپور، انکولہ اور کاروار میں کل منگل کو پرائمری اور ہائی اسکولوں میں چھٹی کا اعلان کیا ہے۔جبکہ دیگر تعلقہ جات میں متعلقہ علاقوں کے تعلیمی آفسروں کو ہدایت دی ہے کہ وہ اپنے اپنے علاقہ میں بارش کے پیمانے کو دیکھتے ہوئے فیصلہ لیں۔
اِدھر بھٹکل میں بلاک ایجوکیشن آفسر نے زوردار بارش کو دیکھتے ہوئے بھٹکل کے سبھی ہائی اسکولوں اور پرائمری اسکولوں میں چھٹی کا اعلان کیا ہے، البتہ انہوں نے بتایا ہے کہ اسکول کے ٹیچروں کو یوم آزادی کی تقریبات کی تیاریوں کے لئے اسکولوں میں حاضری دینی ہوگی۔ پڑوسی تعلقہ ہوناور میں بھی اسکولوں میں صرف بچوں کو چھٹی دی گئی ہے۔
اُڈپی کے کاپو سے موصولہ اطلاعات کے مطابق تعلقہ کے مانی پور دیہات میں ایک مکان پر درخت گرنے سے مکان کو شدید نقصان پہنچا ہے، بتایا گیا ہے جس وقت درخت گرا، اُس وقت گھر پر کوئی موجود نہیں تھا۔ اسی طرح ضلع جنوبی کینرا کے بیلتنگڈی تعلقہ کے ساونالو میں طوفانی ہوائوں کے ساتھ ہورہی بارش سے 25 بجلی کے کھمبے گرنے سے بجلی سپلائی بری طرح متاثر ہوئی ہے۔
ضلع جنوبی کینرا میں مینگلور سے ہاسن کو جوڑنے والی شرڈی گھاٹ پر زبردست بارش کے نتیجے میں پھر ایک بار چٹان کھسکنے کی واردات پیش آئی ہے اور سڑک سواریوں کے لئے بند ہوگئی ہے۔ذرائع نے بتایا کہ چٹان کھسکنے کی واردات پُتور میں پیش آئی ہے اور جے سی بی کی مدد سے سڑک کو صاف کیا جارہا ہے۔
ساحلی اضلاع کے ایک پڑوسی ضلع شموگہ سے ملی اطلاع کے مطابق موسلادھار بارش کا سلسلہ وہاں بھی جاری ہے اوربھاری بارش کو دیکھتے ہوئے ضلع کے تعلیمی آفسر نے کل منگل کو تیرتاہلّی اورہوسانگر تعلقہ جات میں چھٹی کا اعلان کیا ہے۔