بیرونی ریاستوں کے ادویات پر نگاہ رکھی جائے ڈرگس کنٹرول آفس کے دورہ کے دوران شیوا نند ایس پاٹل کی افسروں کو ہدایت
بنگلورو،25؍جون(ایس او نیوز) ریاستی وزیر صحت شیوانند ایس پاٹل نے جمعہ کے دن اچانک شہر کے ڈرگس کنٹرول کے دفتر کا دورہ کرکے وہاں موجود ایچ پی ایس سی لیابریٹری، اینٹی بائیوٹک، اسٹیریلٹی ٹسٹنگ سنٹر کا جائزہ لیا ۔ اس موقع پر انہوں نے بیرونی ریاستوں سے درآمد ہونے والی دوائیوں پر کڑی نظررکھنے اور میعاد ختم ہوجانے والی دواؤں کو مارکیٹ پہنچے سے روکنے متعلقہ افسروں کو ہدایت دی ۔
اس کے ساتھ ہی انہوں نے دفتری کارروائیوں کے متعلق بھی افسروں سے تبادلہ خیال کیا ۔ اس کے بعد میڈیا سے بات کرتے ہوئے انہوں نے بتایاکہ ہبلی اور بلاری کی منشیات کی نگرانی والی لیابریٹری کو ترقی دینے کیلئے حکومت کی طرف سے مناسب اقدامات کئے جائیں گے ۔ ناقص دواؤں کا پتہ چلنے پر متعلقہ کمپنیوں کو نوٹس جاری کرنے کی ہدایت دی گئی ہے ۔
انہوں نے بتایا کہ ڈرگس کنٹرول کے دفتر میں ہی مرکزی حکومت کی دواؤں کی نگرانی کرنے کیلئے ایک کمرہ دیا گیا ہے ۔ ضرورت کے مطابق افزود کمرے دئے جائیں گے ۔ انہوں نے مزید بتایا کہ ڈرگس کنٹرول کے دفتر کو آئی ایس او اور نیشنل اکریڈیشن بورڈ فار ٹسٹنگ اینڈ کیالیبریشن لیابریٹریس (این اے بی ایل ) سرٹی فکیٹ حاصل کرنے کیلئے مناسب سہولیات فراہم کی جائیں گی ۔ اس کے علاوہ دفترمیں موجود بدحال کمروں کی مرمت کا کام بھی جلد از جلد شروع کیا جائے گا ۔
ڈرگس کنٹرول کے محکمہ میں خالی عہدوں کو بھرتی کرنے کیلئے کے پی ایس سی کو تجویز پیش کی گئی ہے ۔ کے پی ایس سی نے چند تفصیلات پیش کرنے کی اپیل کی ہے بہت جلد تفصیلات فراہم کرکے عہدے بھرتی کرنے کی کوشش کی جائے گی ۔