بنگلورو27؍اگست(ایس او  نیوز) وزیر اعلیٰ ایچ ڈی کمار سوامی کو آج اس وقت بہت بڑی راحت ملی جب ارکاوتی لے آؤٹ کی زمین ڈی نوٹی فائی کرانے کے مقدمے سے عدالت نے انہیں بری کردیا۔

2007 میں جب کمار سوامی ریاست کے وزیراعلیٰ تھے، اس وقت روی پرکاش اور رام لنگم نامی افراد نے کمار سوامی پر اراضی ڈی نوٹی فائی کرنے کا الزام لگایاتھا، تاہم وزیراعلیٰ ایچ ڈی کمار سوامی نے اس سلسلے میں اپنا موقف براقرار رکھا اور الزامات کا سامنا کیا۔ اس کیس میں جملہ چار ملزمین تھے، جن میں سے کمار سوامی کے بری ہوجانے کے بعد دیگر ملزمین کے بھی بری ہونے کا امکان روشن ہوگیا ہے۔

وزیر اعلیٰ ایچ ڈی کمار سوامی پر عائد الزامات مسترد کرنے کے لئے دائر عرضی کی سماعت کرتے ہوئے آج ہائی کورٹ نے اس معاملے سے کمار سوامی کو بری قرار دیا۔ اس کیس کے ایک اور ملزم سابق وزیر چنیگپا کو بھی عدالت نے بری کرنے کا اعلان کیا ہے۔ اس کیس کے جج جسٹس وی وی کمار کی طرف سے یہ فیصلہ صادر کیا گیا ہے۔ کمار سوامی کے وزیر اعلیٰ بننے کے بعد یہ معاملہ ان کے علم میں لایا گیا تھا۔