کاروار 16؍مئی (ایس او نیوز)پچھلے کچھ دنوں سے ضلع شمالی کینرا وقف کمیٹی کا دفتر کاروار سے سرسی منتقل کرنے کا تنازعہ سرخیوں میں ہے۔ خیال رہے کہ ریاستی وقف بورڈنے سالہا سال سے ضلع ہیڈکوارٹر کاروار میں موجود وقف کمیٹی کے دفتر کے لئے کاروار میں مناسب جگہ نہ ہونے کا سبب بتاتے ہوئے سرسی شہر میں منتقل کرنے کی ہدایت جاری کی تھی۔

کاروار کے وقف اداروں کے صدور اور اراکین نے اس فیصلے کے خلاف آواز اٹھائی اور کسی بھی حالت میں ضلع ہیڈکوارٹر سے باہر وقف کمیٹی کا دفتر منتقل نہ کرنے کا مطالبہ کرتے ہوئے ڈپٹی کمشنر کو میمورنڈم دیا تھا۔اس کے ساتھ کرناٹک وقف بورڈ کے سی ای او نے جو حکم جاری کیا تھا اس پر روک لگانے کے لئے ہائی کورٹ کا دروازہ بھی کھٹکھٹایا تھا۔اس پر جسٹس پی ایس دنیش کی بنچ نے عبوری حکم جاری کرتے ہوئے کرناٹکا وقف بورڈ کی طرف سے وقف کمیٹی کا دفتر کاروار سے سرسی منتقل کرنے کے لئے جاری کردہ حکم پر 2مہینوں کا اسٹے آرڈر دیدیا ہے۔ 

کاروار وقف اداروں کے صدور اور اراکین نے ضلع ڈپٹی کمشنر سے مطالبہ کیا ہے کہ کاروار میں ہی پی ڈبلیو ڈی کے تحت آنے والی کسی بھی عمارت میں ضلع وقف کمیٹی کا دفتر منتقل کیا جائے تاکہ پورے ضلع میں موجود وقف اداروں کے ذمہ داران کو اپنے مسائل کے حل کے لئے شہر در شہر بھٹکنے کی بجائے ضلع ہیڈکوارٹر میں ہی بیک وقت تما م محکمہ جات کے دفاتر سے رابطہ قائم کرنے کی سہولت بحال رہے۔