میسور ، شیموگہ اور ٹمکور سٹی کارپوریشنوں کے انتخابات 31؍اگست کو
بنگلورو،9؍اگست(ایس او نیوز)ریاست کے 105بلدی اداروں کے لئے جہاں 29اگست کو انتخابات کا اعلان کیا گیا ہے اس کے ساتھ ہی آج ریاستی الیکشن کمیشن نے تین سٹی کارپوریشنوں کے لئے انتخابات کی تاریخ کابھی اعلان کردیا۔ اس سلسلے میں وارڈ ریزرویشن کو لے کر ہائی کورٹ میں دائر عرضی مسترد کئے جانے کے نتیجے میں ریاستی الیکشن کمیشن نے آج میسور ، شیموگہ اور ٹمکور سٹی کارپوریشنوں کے انتخابات کا اعلان کیا۔ الیکشن کمیشن کی طرف سے جاری تاریخوں کے مطابق ان تینوں سٹی کارپوریشنوں میں پولنگ 31 اگست کو ہوگی۔ اور ووٹوں کی گنتی 3؍ ستمبر کو کی جائے گی۔ ان انتخابات کے لئے نوٹی فکیشن 13 اگست کو جا ری کیا جائے گا اور 20اگست تک نامزدگیوں کے پرچے داخل کئے جاسکیں گے۔ 21کو نامزدگیوں کی جانچ کی جائے گی۔