دہلی میں دخانی ہلاکت آفرینی جاری ، عوام پریشان
نئی دہلی، 12 نومبر (ایس او نیوز؍آئی این ایس انڈیا ) قومی دارالحکومت میں آج بھی دن کے آغاز دخانی ہوا کے ساتھ ہوا ۔ وہیں درجہ حرارت میں بھی تبدیلی ہوئی اور درجہ حرارت لڑھک کر 13ڈگری سیلسیس پہنچ گیا ، جس کی وجہ سے عوام کو خنکی کا احساس ہوا۔ محکمہ موسمیات کے ایک افسر نے بتایا کہ نمی کے 98 فیصد کے انتہائی سطح پر رہنے کی وجہ سے دہلی میں دخانی ہوا کی یلغار رہی ۔ مزید برآں ایک اور حکام کے مطابق 14۔15 نومبر کو شہر میں ہلکی بارش ہونے کا امکان ہے، جس سے ابر کے بڑھ جانے کے آثار ہیں ؛ لیکن دخانی فضا میں کمی کی توقع ہے ۔قومی دارالحکومت میں گزشتہ کچھ دنوں سے دخانی فضا کا تسلط ہے ۔ اس کے بعد حکام کو تعمیراتی سرگرمیوں پر روک لگانے اور اینٹ بھٹوں کو بندکیے جانے بشمول کئی ہنگامی اقدامات اٹھانے پڑے تھے۔محکمہ موسمیات کے مطابق آسمان جزوی طور پر ابر آلود اور زیادہ سے زیادہ 28 ڈگری سینٹی گریڈ کے قریب قریب رہنے کا امکان ہے ۔