ہاسن میں ریت کی غیر قانونی سپلائی۔ پولیس ہیڈ کانسٹیبل سمیت 2گرفتار
ہاسن22؍اپریل (ایس او نیوز) ریت کی غیر قانونی سپلائی کا ایک ایسا معاملہ سامنے آیا ہے جس میں ایک پولیس ہیڈ کانسٹیبل براہ راست شامل تھا۔ موصولہ رپورٹ کے مطابق الیکشن کے پیش نظر قائم کیے گئے چیک پوسٹ پر جب افسران نے ایک ٹپر کو روکنے کا اشارہ کیا تو ڈرائیور نے پہلے نظر انداز کرتے ہوئے تیز رفتاری سے گاڑی آگے بڑھا نے کی کوشش کی، لیکن موقع پر موجود افسران ٹپر رکوانے میں کامیاب ہوگئے ، جس کی تلاشی لینے پر پتہ چلا کہ اس کے اندر غیرقانونی طور پر ریت لدی ہوئی ہے۔
تحصیلدار امیش نے بتایا کہ جب رات گیار بجے کے قریب گاڑی رکوائی گئی تو ڈرائیوردیوراجونے گاڑی سے کودکر بھاگنے کی کوشش کی جسے دھر لیا گیا۔ مگر اندر موجود شخص بیلور پولیس اسٹیشن سے وابستہ ہیڈ کانسٹیبل نکلاجس کانام کمار ہے۔ تحصیلدار کے مطابق کمار نے ان افسران کے ساتھ بہت ہی بدتمیزی کی اور گالی گلوچ کرنے لگا۔ڈرائیور نے پھر ہاڈے بیلور پولیس اسٹیشن میں کیس درج کرتے ہوئے ڈرائیور اورہیڈکانسٹیبل کمار کو گرفتار کیاگیا۔ جنہیں عدالتی حراست میں بھیجا گیا ہے۔چیک پوسٹ پر موجود افسران کا خیال ہے کہ ہیڈکانسٹیبل کمار اس طرح کی غیر قانونی سرگرمی میں بہت دنوں سے ملوث رہا ہوگاجس کی وجہ سے وہ بے خوف ہوکر ریت سے لدی ہوئی گاڑی کو چیک پوسٹ سے بھگالے جانے کا منصوبہ بناکر نکلا تھا۔ مگر ڈرائیور کی گھبراہٹ نے سب چوپٹ کردیااور اسے رنگے ہاتھوں گرفتار ہونا پڑا۔