آدھی رات کو لگنے والی آگ میں منگلورو تابنگلورو بس جل کر خاک۔کوئی جانی نقصان نہیں
ہاسن 22؍نومبر (ایس او نیوز) منگلورو سے بنگلورو کی طرف جانے والی ایک سلیپر کوچ بس میں آدھی رات کے وقت اچانک آگ بھڑک اٹھنے سے بس چل کر خاک ہوگئی مگر ڈرائیور کی مستعدی اور بروقت کارروائی کی وجہ سے کسی قسم کا جانی نقصان نہیں ہوا ہے۔
کہاجاتا ہے کہ ہاسن کے مضافات میں نیشنل ہائی وے نمبر 75پر کنچٹا ہلّی نامی مقام پر یہ حادثہ پیش آیا۔ آدھی رات کے وقت جیسے ڈرائیور کو احساس ہوا کہ بس میں آگ بھڑکنے والی ہے تو اس نے فوری اقدام کرتے ہوئے بس میں موجودتمام 30مسافروں کو بحفاظت بس سے باہر نکال لیا۔اس کے کچھ دیر بعد پوری بس کو آگ کے شعلوں نے نگل لیا اور مسافروں کا پورالگیج مکمل طور پر جل کر خاکستر ہوگیا۔
مضافاتی پولیس اسٹیشن کے عملے نے موقع پر پہنچ کر معائنہ کیا اور دیگر بسوں کے ذریعے مسافروں کو بنگلورو بھیجنے کا انتظام کیا گیا ۔شبہ کیا جاتا ہے کہ انجن میں کوئی تیکنیکی خامی کی وجہ سے یہ آگ بھڑکی ہوگی۔