ہاسن 20مارچ (مدثر احمد/ایس او نیوز) کانگریس صدر راہل گاندھی کی آمد پر شہر میں لگائے گئے استقبالیہ فلیکس بینرس اور جھنڈے بلدیہ کی طرف سے ہٹانے کی کوشش سے ناراض کانگریس اراکین نے بلدیہ کے سامنے راستہ روک کر احتجاجی مظاہرہ کیا۔

بتایا گیا ہے کہ کانگریس اراکین نے بلدیہ کی اجازت لے کر شہر میں فلیکس ، پوسٹرس اور جھنڈے لگائے تھے ، لیکن اچانک بلدیہ کے اہلکاروں نے فلیکس ہٹانے کی کارروائی شروع کی۔ اس بات کی اطلاع ملتے ہی کانگریسی لیڈران اور کارکنان بلدیہ کے پاس جمع ہوگئے اور اہلکاروں سے سوال کیا تو انہوں نے بتایا کہ بلدیہ صدر نے شہر سے جھنڈے اور فلیکس بینرس ہٹانے کی ہدایت دی ہے۔ اس پر کانگریس اراکین مشتعل ہوگئے اور بلدیہ کے سامنے ہی دھرنا دیتے ہوئے راستہ روکو احتجاجی مظاہرہ کیا۔

حالات پر قابو پانے کے لئے پولیس کو کڑی مشقت کرنی پڑی۔احتجاجیوں کو سمجھانے کی کوشش کی گئی کہ ماحولیاتی آلودگی کے پیش نظر شہر میں کسی کو بھی فلیکس بینرس اور پلاسٹک جھنڈے لگانے کی اجازت نہیں ہے۔ اسی وجہ سے یہ فلیکس ہٹائے جارہے ہیں، اس سے ہٹ کر کوئی سیاسی پہلو اس کارروائی کانہیں ہے۔ لیکن مشتعل کانگریسی لیڈران جب احتجاج ختم کرنے پر آمادہ نہیں ہوئے تو افزود پولیس فورس کے ساتھ چیف افیسر نے موقع پر پہنچ کر احتجاجیوں کو سمجھایا کہ بغیر اجازت کے راستہ روکو مظاہرہ کیا جارہا ہے ، اس لئے مظاہرین اپنا احتجاج واپس لیں۔ جب چیف افیسر نے بینرس اور دیگر اشتہار نہ ہٹانے کا تیقن دیا تو پھر احتجاجی مظاہرہ ختم کیا گیا۔