ہانگل کے ہیرور میں ہوئے تشدد کے واقعات اور غریب مسلمانوں کی گرفتاریوں کے بعد اے پی سی آر ٹیم نے کیا ہانگل دورہ؛ ایس پی سے کی ملاقات
بنگلور20/ستمبر (ایس او نیوز) ضلع ہاویری کے ہانگل تعلقہ کے ہیرور میں گنیش تہوار کے دوران ہوئے تشدد کے واقعات کے بعد کئی غریب مسلمانوں کی گرفتاریوں نیز کئی مسلمانوں کے تشدد میں زخمی ہونے کی اطلاعات کے بعد اے پی سی آر (اسوسی ایشن فور پروٹیکشن آف سیول رائٹس) کی ایک ٹیم ہانگل پہنچی اور متاثرہ علاقہ کا دورہ کرتے ہوئے حالات کا مکمل جائزہ لیا۔ اے پی سی آر ٹیم نے ہاویری پہنچ کر ضلع کے ایس پی مسٹر پرمیشور سے بھی ملاقات کی اور جیلوں میں جاکر گرفتار کئے گئے غریب مسلمانوں سے بھی ملاقات کرتے ہوئے تفصیلات سے آگاہی حاصل کی۔ ٹیم نے ہاویری سرکاری اسپتال کا بھی دورہ کیا اور تشدد میں زخمی ہونے والوں کی بھی عیادت کرتے ہوئے تمام تفصیلات حاصل کیں۔
بنگلورسے اے پی سی آر کے ریاستی رکن ایڈوکیٹ عبدالسلام کی قیادت میں وفد نے ضلع کے ایس پی پرمیشور سے ملاقات کرتے ہوئے پولس کی جانب سے کی گئی زیادتیوں کے تعلق سے شکایت کی اور مطالبہ کیا کہ خاطی پولس اہلکاروں کے خلاف کاروائی کی جائے اور پولس نے جتنے بھی بے قصور لوگوں کو گرفتار کیا ہے، اُنہیں فوری رہا کیا جائے۔ وفد نے اسپتال میں زیرعلاج زخمیوں کے تعلق سے بتایا کہ پولس نے اُن کی بے رحمی کے ساتھ پیٹائی کی ہے ، یہاں تک کہ عورتوں اور بچوں کو بھی نہیں بخشا گیا ہے۔
ایس پی مسٹر پرمیشور نے تمام شکایتوں کو سننے کے بعد وفد کو یقین دلایا کہ وہ تمام واقعات کی انکوائری کریں گے اور اس بات کو یقینی بنائیں گے کہ بے قصورلوگوں کو بلاوجہ گرفتار نہ کیا جائے۔انہوں نے حاملہ عورت کے تعلق سے بتایا کہ غالباً اُسے دھکا لگا ہوگا ورنہ پولس نے اُس کی پیٹائی نہیں کی ہے۔البتہ انہوں نے اس بات کو قبول کیا کہ پولس اہلکاروں کی طرف سے کچھ زیادتی بھی ممکن ہے، مگر انہوں نے یقین دلایا کہ وہ اس تعلق سے ضروری اقدامات اُٹھائیں گے اور ضروری کاروائی کریں گے۔
اے پی سی آر وفد میں بنگلور سے ایڈوکیٹ عبدالسلام کے ساتھ محمد فضل، چتردرگہ کے APCR صدرڈی وائی ایس پی اسحاق، ہاویری کے APCR صدر عظمت اللہ، عبدالقادر، دادا پیر، ظہیر عباس و دیگر موجود تھے۔
اے پی سی آر۔ریاستی سکریٹری ایڈوکیٹ نیاز احمد نے بتایا کہ ہانگل تعلقہ کے ہیرور میں ہوئے تشدد کے واقعات کے بعد جیلوں میں بند بے قصور لوگوں کی رہائی کے لئے ہرممکن قانونی امداد فراہم کی جائے گی۔اس ضمن میں انہوں نے ہانگل میں موجود اے پی سی آر کے ضلعی سکریٹری ایڈوکیٹ یاسر عرفات سے رابطہ کرنے کی درخواست کی ہے۔جن کا موبائل نمبریہ ہے: 9886827691
