بھٹکل کے حنیف آباد علاقے میں پانی کی شدید قلت : عوام سخت ناراض
بھٹکل:22/اپریل (ایس او نیوز)موسم گرما کی شدت سے انسان، مویشی ہرکوئی پریشان ہے، تپش کا پیمانہ 36ڈگری سلیس پار کررہاہے، گھروں کے اندر بیٹھے رہیں تو پنکھے سے کوئی بھی راحت نہیں مل رہی ہے، مگر یہاں سوال ہوا کا ہی نہیں ، بلکہ زندگی کے لئے ضروری پانی کا ہے، سمندر کنارے رہتے ہوئے بھی عوام پینے کے پانی کے لئے ترساں ہیں، ہرجگہ پانی کی قلت سے حلق سوکھے جارہے ہیں ۔ جانور ندی،نالوں اور سمندر کی راہ لے رہے ہیں۔
تعلقہ کے اکثر علاقوں میں کنوئیں سوکھ گئے ہیں۔ ایسے میں ڈیم کے ذریعے پائپ سے پانی سپلائی کی کہانی الگ دکھڑا سنارہی ہے۔ تعلقہ کے ہیبلے گرام پنچایت حدود کے حنیف آباد میں بورنگ کے ذریعے پانی کی قلت دور کرنے کی کوشش کی گئی مگر اسی علاقے کے 40سے زائد گھروں کو پانی سپلائی نہیں کئے جانے کا عوام نے الزام لگایا ہے۔ علاقے کے عوام پانی سپلائی کے لئے محکمہ کومتعلقہ رقم ادا کرکے 7برس گذر گئے لیکن پانی کا بوند انہیں مل پانے کی شکایت عام ہوتی جارہی ہے۔ عوام کا کہنا ہے کہ ہمارے لئے بورنگ کی کھدائی ہوئی ، لیکن پانی پائپ کے ذریعے دوسری جگہ سپلائی کیاجارہاہے تو کیا پئیں بتائیے ۔
فی الحال ہماری پریشانی کو دیکھتے ہوئے حنیف آباد ویلفئیر اسوسی ایشن اور مدینہ ویلفئیر سوسائٹی ٹینکر کے ذریعے پانی سپلائی کررہے ہیں، سوال یہ ہے کہ اگر یہ ادارے بھی پانی سپلائی کرنا بند کریں تو پھر ہم کہاں جائیں ؟۔ عوام نے انتظامی معاملے کی سنگینی کو دیکھتے ہوئے فوری بیدار ہوکر ضروری اقدامات کرنےکا مطالبہ کیا ہے۔