ہلیال20؍ستمبر (ایس او نیوز)شہر کے تاریخی قلعہ روڈ پر واقع عمارت کے سامنے کسی محکمے یا پولیس کی اجازت کے بغیرآدھی رات کے وقت شیواجی کی مورتی نصب کرنے پر ہنگامہ ہوگیا اور مشتعل ہجوم کو قابو میں کرنے کے لئے پولیس کو ہلکا لاٹھی چارج کرنا پڑا۔جس کے دوران مقامی پی ایس آئی آنند مورتی کو بھی معمولی چوٹیں آنے کی خبر ہے۔

بتایا جاتا ہے کہ اس طرح بغیر اجازت مورتی نصب کرنے کی تیاری دیکھتے ہوئے پولیس نے اعتراض جتایا تو وہاں پر جمع ہونے والے ہجوم اور پولیس کے درمیان بحث و مباحثہ شروع ہوگیا۔پولیس کی مخالفت کے باوجود بسون گلی، مہاویر گلی، گرام دیوی گلی، شیٹی گلی اور آزاد روڈ کے سیکڑوں لوگوں نے گھوڑے پر سوار شیواجی کی تقریبا1000کلو گرام وزنی مورتی اوڈچمّا مندر کے احاطے سے قلعہ روڈ کے متعلقہ مقام تک لاکر رات 1بجے وہاں نصب کرکے ہی دم لیا۔

کہتے ہیں کہ گزشتہ ایک سال سے اس مقام پر شیواجی کی مورتی نصب کرنے کا منصوبہ چل رہاتھا۔ متعلقہ محکمہ جات سے اجازت دینے کی اپیل بھی کی گئی تھی۔لیکن سپریم کورٹ کے فیصلے کی روشنی میں وہاں مورتی نصب کرنے کی باضابطہ اجازت نہیں دی گئی تھی۔اس پس منظر میں تقریباً 6مہینے قبل 3لاکھ روپے کی لاگت سے بنائی گئی یہ مورتی کل آدھی رات کو زور زبردستی کے ساتھ نصب کردی گئی۔

تحصیلدار ودیا دھر گولگولی کا کہنا ہے کہ متعلقہ محکمہ کی جانب سے نو آبجکشن کی تحریر کے بغیر اور عدالت کے حکم کی خلاف ورزی کرتے ہوئے اس علاقے کے لوگوں نے مورتی نصب کردی ہے ، اس سلسلے میں انہوں نے اپنی تفصیلی رپورٹ ڈپٹی کمشنر کو بھیج دی ہے۔جبکہ ایڈیشنل ایس پی گوپال بیاکوڈ نے بتایا کہ اس واقعے کے تمام پہلوؤں کا جائزہ لیا جارہا ہے۔ چونکہ یہ مذہبی جذبات سے جڑا ہوامعاملہ ہے اس لئے اس واقعے میں ملوث افراد کے خلاف ایف آئی آر درج کرنے کے سلسلے میں غور کیا جارہا ہے۔ اس معاملے پر اعلیٰ افسران کی توجہ مبذول کروائی گئی ہے۔

لاٹھی چارج اور ا س کے بعدبدلتے حالات کو دیکھ کر پولیس نے تمام علاقوں میں حفاظتی بندوبست بڑھا دیا ہے۔ احتیاط کے طور ڈسٹرکٹ آرمڈ ریزرو فورس کی ٹکڑیاں بھی تعینات کردی گئی ہیں۔ایڈیشنل ایس پی اور ڈی وائی ایس پی شہر میں قیام کرتے ہوئے حالات کی نگرانی کررہے ہیں۔