ایچ اے ایل ایرپورٹ کا شہری خدمات کیلئے استعمال جلد
بنگلورو،15؍فروری(ایس او نیوز) کیمپے گوڈا انٹرنیشنل ایرپورٹ میں دن بدن طیاروں کی بڑھتی ہوئی تعداد اور ٹریفک کے مسئلے کو دیکھتے ہوئے شہر میں ایک اور ایرپورٹ کی ضرورت شدت سے محسوس کی جارہی ہے۔ اسی لئے ایچ اے ایل کے پرانے ایرپورٹ کو دوبارہ شروع کرنے کی بات چیت جاری ہے۔اگلے چند ماہ میں دیسی اڑانوں کیلئے اس ایرپورٹ کا استعمال کیا جاسکتاہے۔ یہ بات آج ایچ اے ایل کے چیرمین اور منیجنگ ڈائرکٹر ٹی سورنا راجو نے بتائی۔انہوں نے کہاکہ عرصۂ دراز سے یہ مطالبہ رہا ہے کہ ایچ اے ایل ایرپورٹ کو داخلی اڑانوں کیلئے استعمال میں لایا جائے۔ اس سلسلے میں کیمپے گوڈا انٹرنیشنل ایرپورٹ لمیٹیڈ سے بات چیت جاری رہی۔ اگلے چند ماہ میں ایچ اے ایل ایرپورٹ سے داخلی اڑانوں کی اجازت ملنے کی توقع ہے۔انہوں نے کہاکہ جس وقت بنگلور انٹرنیشنل ایرپورٹ کی شروعات کی گئی تھی، اس وقت حکومت ہند کے ساتھ ایرپورٹ کی تعمیر کرنے والے جی ایم آر گروپ نے ایک معاہدہ کیا تھاکہ 25سال تک موجودہ ایرپورٹ کے 150کلومیٹر کے دائرہ میں کوئی اور ایرپورٹ نہیں تعمیر کیا جائے گا۔ہائی کورٹ نے بھی اس معاہدے میں کوئی مداخلت کرنے سے انکا رکردیا ۔ تاہم بڑھتی ہوئی فضائی ٹریفک اور سڑکوں کے بہتر نیٹ ورک کی ضروریات سے پریشان موجودہ ایرپورٹ حکام نے ایچ اے ایل ایرپورٹ کے استعمال کی ضرورت محسوس کی ہے، اس سلسلے میں بات چیت جاری ہے ، انہیں توقع ہے کہ ایچ اے ایل کو اس میں کامیابی ملے گی۔ انہوں نے بتایاکہ ایچ اے ایل کو جنگی طیاروں جاگوار، سخوئی اور تیجس سمیت دیگر اہم طیاروں کی تیاری کے آرڈرس ملے ہیں۔ 2019-20 تک 222 سخوئی طیارے تیار کئے جائیں گے۔ جبکہ ہندوستانی فضائیہ میں تین تیجس طیارے شامل کئے جائیں گے۔ ساتھ ہی ایک ہزار کروڑ روپے مالیت کے مگ طیارے کو مکمل کرنے کا بھی ایک آرڈر ایچ اے ایل کو ملا ہے۔